ផ្លូវឡូរី ដំបូងគេនៅកម្ពុជា ត្រូវបានសម្ពោធ ដាក់ឲ្យដំណើរការ

2018-01-01 01:12:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ផ្លូវឡូរីមួយខ្សែ ដែលនៅជាប់ជើងភ្នំបាណន់ ស្ថិតក្នុងស្រុកបាណន់ ខេត្តបាត់ដំបង ត្រូវបានបើកសម្ពោធដាក់ឲ្យដំណើរការជាផ្លូវការ ជាលើកដំបូងគេបង្អស់នៅក្នុងប្រទេសកម្ពុជា ក្រោមកិច្ចសហការសាងសង់ឡើងរវាងអាជ្ញាធរខេត្ត និងក្រុមហ៊ុនដៃគូអភិវឌ្ឍន៍។

ក្នុងពិធីសម្ពោធ នៅរសៀលថ្ងៃទី៣១ ខែធ្នូ ឆ្នាំ២០១៧ លោក អ៊ុច អ៊ុភីនីស្សារ៉ា ប្រធានមន្ទីរទេសចរណ៍ខេត្តបាត់ដំបង បានឲ្យដឹងថា ផ្លូវឡូរីនេះមានប្រវែងជាង ៣គីឡូម៉ែត្រ ដែលសាងសង់ឡើងក្នុងគោលបំណងឲ្យភ្ញៀវទេសចរ ជិះឡូរីលេងកម្សាន្ត និងទស្សនាតំបន់ទេសចរណ៍សម្បត្តិវប្បធម៌ សម្បត្តិធម្មជាតិ និងមើលតំបន់កសិទេសចរណ៍ នៅជុំវិញភ្នំបាណន់។

លោកបន្តថា “តម្លៃនៃការជិះឡូរីនេះ គឺភ្ញៀវខ្មែរ (មនុស្សចាស់) តម្លៃ ១ម៉ឺនរៀល សម្រាប់ភ្ញៀវអន្តរជាតិតម្លៃ ២ម៉ឺនរៀល ហើយជាគោលដៅបន្ត យើងនឹងសាងសង់ផ្លូវនេះឲ្យដល់ភ្នំសំពៅ ដែលគិតជារយៈចម្ងាយ ប្រមាណជាង ១៦គីឡូម៉ែត្រ”។

លោក ងួន រតនៈ អភិបាលខេត្តខេត្តបាត់ដំបង បានមានប្រសាសន៍ថា នេះជារូបភាពតូចដំបូងគេ ដែលក្នុងផែនការគោលរបស់ខេត្តទាំងមូល សម្រាប់អភិវឌ្ឍន៍ជុំវិញភ្នំបាណន់ ដើម្បីបម្រើសេវាវិស័យទេសចរណ៍នេះ។

លោកអភិបាលខេត្ត បានបន្តទៀតថា “អីចឹងបើវិស័យទេសចរណ៍នេះវាដំណើរការបាន ដែលយើងរំពឹងទុក គឺថាបាណន់នេះ គឺជាស្រុកដែលសំណាងជាងគេ ដែលមានទិសដៅទេសចរណ៍មកច្រើនជាងគេ ហើយប្រជាពលរដ្ឋមានសំណាង ទទួលបានផល ដោយសារការរីកចម្រើននៃវិស័យទេសចរណ៍នេះឯង”។

នៅឆ្នាំ២០១៧ មានភ្ញៀវទេសចរណ៍ជាតិ និងអន្តរជាតិ បានទៅកម្សាន្តនៅខេត្តបាត់ដំបងមានជាង ៦១ម៉ឺននាក់ កើនឡើង ១,៣៦ភាគរយ បើធៀបទៅនឹងឆ្នាំ ២០១៦ ដែលក្នុងនោះ ភ្ញៀវបារាំងជាប់លេខ១ អាមេរិកលេខ២ និងថៃលេខ៣៕