រឿងរន្ធត់ទាំង១០ ដែលនឹងកក្រើកក្នុងឆ្នាំ២០១៨នេះ
- 2018-01-07 08:33:59
- ចំនួនមតិ 0 | ចំនួនចែករំលែក 0
រឿងរន្ធត់ទាំង១០ ដែលនឹងកក្រើកក្នុងឆ្នាំ២០១៨នេះ
ចន្លោះមិនឃើញ
ចំពោះអ្នកចូលចិត្តភាពយន្តបែបរន្ធត់ ក្នុងឆ្នាំ២០១៨នេះ នឹងមិនខកចិត្តទេ។ សាច់រឿងបែបរន្ធត់ថ្មីៗ និងសែស្រឡាយភាពយន្តល្បីៗដូចជា "The Nun” និង "The Purge” សុទ្ធតែមានវត្តមាននៅឆ្នាំនេះទាំងអស់។ សាច់រឿងដែលទាក់ទងនឹងការសម្លាប់ លងបន្លាច និងរឿងអាថ៌កំបាំងជាច្រើននឹងត្រូវបង្ហាញក្នុងភាពយន្តអស់ទាំងនេះ។
នេះជាបណ្ដារឿងរន្ធត់ទាំង១០ដែលនឹងកក្រើកក្នុងឆ្នាំ ២០១៨៖
១. “Truth or Dare” បញ្ចាំងខែឧសភា
តារាសម្ដែងល្បីៗដូចជា Tyler Posey ពីរឿងភាគ "Teen Wolf” និង Lucy Hale ពីក្នុងរឿងភាគ "Pretty Little Liars” នឹងមកជួបគ្នាក្នុងសាច់រឿងនេះ ដែលនិយាយអំពីវិញ្ញាណដ៏កាចសាហាវមួយបង្ហាញខ្លួនក្រោយពួកគេលេងល្បែង Truth or Dare។
២. “The Nun” បញ្ចាំងខែកក្កដា
យាយ Valak ដែលល្បីខ្លាំងនៅក្នុងរឿង "The Conjuring 2” នឹងត្រូវគេលាតត្រដាងពីសាច់រឿងលំអិតនៅក្នុងភាពយន្តនេះ។
៣. “Purge: The Island” បញ្ចាំងខែកក្កដា
ភាពយន្តនេះនឹងលាតត្រដាងនូវហេតុការណ៍ផ្សេងៗកើតឡើង ដែលបណ្ដាលឲ្យមានការប្រារព្ធកម្មវិធី "Purge” កាលពីលើកដំបូង។
៤. “Slender Man” បញ្ចាំងខែឧសភា
ជារឿងនិយាយអំពីរឿងព្រេងនិទានមួយអំពីបិសាច "Slender Man” ដែលមានរូបរាងខ្ពស់និងដៃវែងៗ គ្មានមុខមាត់។ បិសាចនេះបានធ្វើឲ្យក្មេងតូចៗ និងជំទង់ជាច្រើនបាត់បង់ខ្លួនជាបន្តបន្ទាប់។
៥. “A Quiet Place” បញ្ចាំងខែមេសា
ចូលរួមសម្ដែងដោយតារាប្ដីប្រពន្ធ លោក John Krasinski និង Emily Blunt ភាពយន្តនេះ និយាយពីហេតុការណ៍មួយ តម្រូវឲ្យពួកគេនៅស្ងៀមស្ងាត់ ដើម្បីគេចចេញពីគ្រោះថ្នាក់ដ៏អាថ៌កំបាំងមួយតាមធ្វើបាបពួកគេប្រសិនជាបញ្ចេញសំឡេង។
៦. “Halloween” បញ្ចាំងខែតុលា
ភាពយន្តនេះជាភាពយន្តដែលបង្កើតម្ដងទៀតពីសែស្រឡាយរឿង "Halloween” ដែលបានដាក់បញ្ចាំងតាំងពីឆ្នាំ ១៩៧៨។ តួអង្គ Laurie សម្ដែងដោយ Jamie Lee Curtis នឹងត្រូវមកតទល់ជាមួយនឹង Michael Myers ឃាតករពាក់ស្រោមមុខ ដែលនាងធ្លាប់ជួបប្រទះកាលពីបួនទសវត្សកន្លងមក។
៧. “Day of the Dead: Bloodline” បញ្ចាំងខែមករា
និយាយអំពីក្រុមទាហានមួយក្រុម ខិតខំរកមធ្យោបាយ ក៏ដូចជាថ្នាំព្យាបាលមនុស្សទូទាំងពិភពលោក ដែលកំពុងលុកលុយដោយខ្មោច Zombie។
៨. “The Strangers: Prey at Night” បញ្ចាំងខែមិនា
ដកស្រង់ពីហេតុការណ៍ពិត ភាពយន្តនេះនិយាយពីក្រុមគ្រួសារមួយ ដែលត្រូវមនុស្សកាចសាហាវ (Psychopaths) ចំនួន៣នាក់ តាមយាយីតាំងពីដើមរហូតដល់ចប់។
៩. “Winchester” បញ្ចាំងខែកុម្ភៈ
ជាសាច់រឿងដកស្រង់ពីហេតុការណ៍ពិតនៃវិមានរបស់គ្រួសារ "Winchester” ដែលបង្កប់ទៅដោយព្រលឹងខ្មោចបិសាច និងការលងបន្លាចយ៉ាងសាហាវឃោរឃៅ។
១០. “Insidious: The Last Key” បញ្ចាំងខែមករា
អ្នកជំនាញខាងព្រលឹងខ្មោចឫក៏គេហៅថា Parapsychologist គឺ Dr. Elise Rainier ដែលយើងស្គាល់ពីបណ្ដារឿង "Insidous” វគ្គមុនៗនោះបានត្រលប់មកវិញជាមួយនឹងរឿងរ៉ាវគួរឲ្យខ្លាចតម្រូវឲ្យនាងដោះស្រាយ នៅក្នុងផ្ទះគ្រួសារនាងផ្ទាល់តែម្ដង៕