ច្បាប់ថ្មីរបស់ស្វីស ត្រូវធ្វើឲ្យបង្កងសន្លប់សិន មុនយកទៅស្ងោរ

2018-01-11 02:32:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រដ្ឋាភិបាលប្រទេសស្វីស នឹងចាប់អនុវត្តច្បាប់ថ្មី ក្នុងការបញ្ឈប់សកម្មភាពស្ងោរសត្វបង្កងទាំងរស់។ ច្បាប់នេះ នឹងត្រូវចូលជាធរមានចាប់ពីថ្ងៃទី០១ ខែមីនា ឆ្នាំ២០១៨ខាងមុខ។

ការបញ្ឈប់របៀបស្ងោរបង្កងទាំងរស់នេះ គឺជាផ្នែកមួយនៃការការពារសិទ្ធិសត្វ ក៏ដូចជាបញ្ចៀសការឈឺចាប់ដ៏ខ្លាំងរបស់សត្វបង្កង។ ភ្នាក់ងារសិទ្ធិសត្វ និងក្រុមអ្នកវិទ្យាសាស្ត្រ បានអះអាងថា បង្កង និងប្រភេទសត្វសមុទ្រមួយចំនួន មានប្រព័ន្ធប្រសាទស្មុគស្មាញ ហើយអាចទទួលរងការឈឺចាប់ដ៏ខ្លាំងក្លា នៅពេលពួកវាត្រូវបានគេស្ងោរទាំងរស់។

បើតាមច្បាប់ថ្មីរបស់ស្វីស អ្នកចម្អិន ឬម្ចាស់ភោជនីយដ្ឋាន ត្រូវធ្វើយ៉ាងណាឲ្យសត្វបង្កងសន្លប់ជាមុន ទើបអាចយកទៅស្ងោរបាន។ យោងតាមសារព័ត៌មាន RTS របស់ស្វីស បានបញ្ជាក់ថា មានតែវិធីឆក់អគ្គិសនីនៅខួរបង្កងប៉ុណ្ណោះ ដែលអាចធ្វើឲ្យបង្កងសន្លប់បាន។

ក្រៅពីការស្ងោរបង្កងទាំងរស់ រដ្ឋាភិបាលស្វីស ក៏នឹងហាមឃាត់ផងដែរនូវការដឹកជញ្ជូនសត្វសមុទ្រទាំងរស់ ដូចជាការបង្កកសត្វនៅក្នុងទឹកកកជាដើម៕

ប្រភព៖ theguardian ប្រែសម្រួល៖ ឈាង.