ធឿន ធារ៉ា អាច​ឡើង​វ៉ៃ​ដណ្ដើម​ខ្សែ​ក្រវាត់​នៅថៃ ក្រោយ​​ឈ្នះ​កីឡាករ​ថៃជា​បន្តបន្ទាប់

  • 2018-01-11 04:04:47
  • ចំនួនមតិ 0 | ចំនួនចែករំលែក 0

ចន្លោះមិនឃើញ


អ្នកប្រដាល់​វ័យ ១៩ឆ្នាំ ធឿន ធារ៉ា បាន​បង្ហើប​ឲ្យដឹង​ថាខ្លួន​ទំនង​ជាអាច​ត្រូវ​បាន​គេ​ដាក់​ឲ្យ​វ៉ៃ​ដណ្ដើម​​ខ្សែ​ក្រវាត់ ពេល​ទៅ​ប្រកួត​នៅ​ថៃ​លើក​ក្រោយ។

កីឡាករ​គុន​ខ្មែរ​ដែល​មាន​ដើម​កំណើត​នៅ​ខេត្ត​ព្រៃវែង បាន​អះអាង​ថា ការ​មាន​ឱកាស​ឡើង​វ៉ៃ​ដណ្ដើម​ខ្សែ​ក្រវាត់​ គឺ​ដោយសារ​អ្នក​រៀបចំ​កម្មវិធី មើល​ឃើញ​ពី​សមត្ថភាព​ និង​ប្រជាប្រិយភាព​របស់​ខ្លួន ដែល​កំពុង​កើន​ឡើង។

យ៉ាងណាក្ដី ធារ៉ា​បញ្ជាក់ថា ដំណឹង​នេះ នៅ​មិន​ទាន់​ច្បាស់​ការ​ ១០០% នៅ​ឡើយ​ទេ គ្រាន់​តែ​ឮ​គ្រូ​បង្ហើប​ប្រាប់​ប៉ុណ្ណោះ។

គួរ​បញ្ជាក់ថា ធឿន ធារ៉ា ជា​កីឡាករ​មក​ពី​ក្លឹប​ប្រដាល់ក្រសួង​កសិកម្ម ដែលទើប​ឈ្នះ​មេដាយ​មាស​ថ្នាក់​ជាតិ​ ឆ្នាំ​២០១៧ កាលពី​ពេល​ថ្មីៗ​កន្លង​ទៅ ក្រោយ​យក​ឈ្នះ​​កីឡាករ​ខ្លាំងៗក្នុង​ប្រភេទ​ទម្ងន់ ៧១គីឡូក្រាម។ ប្រជាប្រិយភាព​របស់​ធារ៉ា បាន​ហក់​ឡើង​ដល់​កំពូល​នៅ​ចុង​ឆ្នាំ​២០១៧ ពោល​គឺ​នៅ​ពេលដែល​ធារ៉ា វ៉ៃ​កីឡាករ​ថៃ Numkabuan Kiatnavy ឲ្យ​សន្លប់​ក្នុង​ទឹក​ទី២ ក្នុង​សង្វៀន Max Muoy Thai ប៉ុស្ដិ៍​លេខ ៨ ថៃ (ចុច​មើល​វីដេអូ)។

ធឿន ធារ៉ា វ៉ៃ​កីឡាករ​ថៃ Numkabuan Kiatnavy ឲ្យ​សន្លប់​ទឹក​ទី២ កាលពី​ថ្ងៃ​ទី៣១ ខែធ្នូ ២០១៧

ធឿន ធារ៉ា ធ្លាប់​ឆ្លង​កាត់​ការ​ប្រកួត ២៨ដង ឈ្នះ ២៦ដង ស្មើ ១ដង និងចាញ់តែ ១ដង​ប៉ុណ្ណោះ ក្នុងនោះ ធារ៉ា ធ្លាប់​ឡើង​សង្វៀន​ Max Muay Thai ចំនួន ៨ ដង ដោយឈ្នះ​ ៦ដង ស្មើ១ដង និងចាញ់១ដង៕

ចុចអាន​អត្ថបទ​ទាក់ទង៖

អត្ថបទ៖ នួន ស៊ីណា

អត្ថបទថ្មី
;