រញ្ជួយដី វាយប្រហារប្រទេសមីយ៉ាន់ម៉ាទាំងព្រឹកព្រលឹម

2018-01-12 02:50:10
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រញ្ជួយដីកម្រិត ៦ រ៉ិចទ័រ បានវាយប្រហារតំបន់ដាច់ស្រយាលមួយ នៅភាគកណ្ដាលប្រទេសមីយ៉ាន់ម៉ា នាព្រឹកព្រលឹមថ្ងៃសុក្រ ទី១២ មករា។ នេះបើយោងតាមការប្រកាសរបស់ភ្នាក់ងារស្ទាបស្ទង់ភូគព្ភសាស្ត្រសហរដ្ឋអាមេរិក (USGS)។

USGS បានឲ្យដឹងថា រញ្ជួយដីបានកើតឡើងនៅប្រហែល ៤០គ.ម ពីភាគខាងលិចទីក្រុង Pyu។ បន្ទាប់ពីរញ្ជួយដីនេះបានបញ្ចប់ ក៏មានការរញ្ជួយតិចៗ បានកើតឡើងនៅក្នុងតំបន់នោះចំនួន ៣លើកបន្ថែមផងដែរ ដែលមានកម្រិត ៥,៣រ៉ិចទ័រ។

ចំណុចរញ្ជួយដី គឺនៅចំចំណុចកណ្ដាលរវាងរដ្ឋធានី Nay Pyi Taw និងទីក្រុងពាណិជ្ជកម្ម Yangon ពោលគឺចម្ងាយប្រហែល ១៥០គីឡូម៉ែត្រពីទីក្រុងទាំង២។

របាយការណ៍បឋម បានបង្ហាញថា មិនមានអ្នកស្លាប់ដោយសារគ្រោះរញ្ជួយដីនេះទេ ចំណែកឯទំហំនៃការខូចខាត នៅមិនទាន់ដឹងនៅឡើយ។

រូបតំណាង (រូបភាព៖ Reuters)

គួរបញ្ជាក់ផងដែរថា មីយ៉ាន់ម៉ា តែងរងគ្រោះដោយសាររញ្ជួយដីជាញយដង។ រញ្ជួយដីកម្រិតខ្លាំង (ពី ៧រ៉ិចទ័រឡើងទៅ) បានកើតឡើងចំនួន ៦លើក នៅចន្លោះ ឆ្នាំ១៩៣០ និងឆ្នាំ១៩៥៦។ កាលពីឆ្នាំ២០១៦ កន្លងទៅ រញ្ជួយដីកម្រិត ៦,៨រ៉ិចទ័រ បានវាយប្រហារទីក្រុងបុរាណ Bagan ធ្វើឲ្យមនុស្ស ៣នាក់បានស្លាប់ និងប្រាសាទបុរាណជាច្រើន បានរងការខូចខាត៕

ប្រភព៖ Channelnewsasia ប្រែសម្រួល៖ អឹុម ម៉េងស៊ាង