លោក ប្រាក់ សុខុន នឹងទៅតួកគី ដើម្បីត្រៀមរៀបចំដំណើរទស្សនកិច្ចរបស់សម្តេច ហ៊ុន សែន
- 2018-01-17 02:59:58
- ចំនួនមតិ 0 | ចំនួនចែករំលែក 0
លោក ប្រាក់ សុខុន នឹងទៅតួកគី ដើម្បីត្រៀមរៀបចំដំណើរទស្សនកិច្ចរបស់សម្តេច ហ៊ុន សែន
ចន្លោះមិនឃើញ
លោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសូងការបរទេស និងកិច្ចសហប្រតិបត្តិការអន្តជាតិ គ្រោងនឹងអញ្ជើញទៅបំពេញទស្សនកិច្ចជាផ្លូវការនៅប្រទេសតួកគី នៅដើមឆ្នាំ២០១៨នេះ ដើម្បីត្រៀមរៀបចំសម្រាប់ដំណើរទស្សនកិច្ចរបស់សម្តេចនាយករដ្ឋមន្ត្រី ហ៊ុន សែន នៅប្រទេសនោះ នាពេលខាងមុខនេះ។ នេះបើតាមការបញ្ជាក់របស់លោក ជុំ សុន្ទរី អ្នកនាំពាក្យក្រសួងការបរទេស បន្ទាប់ពីជំនួបរវាងលោក ប្រាក់ សុខុន ជាមួយលោក អ៊ិលហាន កេមាល ទុ(Ilhan Kemal Tug) ឯកអគ្គរដ្ឋទូតប្រទេសតួកគីចប់អាណត្តិប្រចាំកម្ពុជា កាលពីព្រឹកថ្ងៃទី១៦ ខែមករា ឆ្នាំ២០១៨ នៅទីស្តីការក្រសួងការបរទេស។
អ្នកនាំពាក្យបានបន្តថា នៅក្នុងជំនួបពិភាក្សានោះ លោក ប្រាក់ សុខុន បានលើកឡើងឲ្យមានការធ្វើការងាររួមគ្នារវាងភាគីទាំងពីរ ក្នុងការត្រៀមរៀបចំឯកសារសម្រាប់ការចុះហត្ថលេខា ក្នុងដំណើរទស្សនកិច្ចរបស់លោក ក៏ដូចជាសម្រាប់ដំណើរទស្សនកិច្ចរបស់សម្តេច ហ៊ុន សែន ទៅកាន់ប្រទេសតួកគី។
ភាគីទាំង២ ក៏បានពិភាក្សាផ្លាស់ប្តូរយោបល់គ្នាផងដែរ អំពីកិច្ចសហប្រតិបត្តិការលើបណ្តាវិស័យផ្សេងៗទៀត ដូចជា ការជំរុញពាណិជ្ជកម្ម និងការបង្កើតជើងហោះហើរត្រង់ដើម្បីបង្កើនចំនួនទេសចរជាដើម៕