ការប្រកាសសាលដីកា លើសំណុំរឿងលោក ជេមស៍ រីកឃិតសាន់ ត្រូវពន្យារ

2018-01-17 08:37:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

តុលាការកំពូលនៅព្រឹកថ្ងៃទី ១៧ មករានេះ បានសម្រេចពន្យារការប្រកាសសាលដីកា លើបណ្តឹងសុំនៅក្រៅឃុំ របស់ជនជាតិអូស្ត្រាលី លោកជេមស៍ រីកឃិតសាន់ ទៅថ្ងៃទី ៣១ មករា ឆ្នាំ ២០១៨ វិញ ដោយហេតុថា លោកមកកាន់បន្ទប់សវនាការ មិនទាន់ពេលវេលា។

ក្រឡាបញ្ជី លោក សុង ម៉ៅ បានប្រាប់សារព័ត៌មានអូស្ត្រាលី ABC ថា៖ " យើងណាត់ជួបគាត់នៅម៉ោង ៨ ព្រឹក តែម៉ោង៩ ទៅហើយ គាត់នៅតែមិនទាន់មកដល់បន្ទប់សវនាការទៀត ដូច្នេះ ចៅក្រម ក៏សម្រេចពន្យារការប្រកាសសាលដីកាតែម្តងទៅ"។

ប៉ុន្តែ លោកស្រី ពឹង យុហៀប មេធាវីការពារក្តីឱ្យលោក ជេមស៍ រីកឃិតសាន់ និយាយថា ចៅក្រមរវល់នឹងសំណុំរឿងផ្សេងទៀត។

លោកជេមស៍ រីកឃិតសាន់ នៅ តុលាការកំពូលនាព្រឹកថ្ងៃទី ១៧ មករានេះ

លោក ជេមស៍ រីកឃិតសាន់ ត្រូវបានសាលាដំបូងរាជធានីភ្នំពេញ ចោទប្រកាន់ ពីបទប្រមូលផ្ដុំព័ត៌មានជាអាទិ៍ នាំឲ្យអន្តរាយដល់ការការពារជាតិ បន្ទាប់ពីលោកបានបង្ហោះដ្រូន ថតក្បួនហែរបស់បក្សសង្គ្រោះជាតិ ក្នុងយុទ្ធនាការឃោសនាថ្ងៃចុងក្រោយ កាលពីឆ្នាំ ២០១៧។ សំណុំរឿងរបស់លោក បានបន្តពីតុលាការសាលាដំបូង រហូតដល់សាលាឧទ្ធរណ៍។

សាលាឧទ្ធរណ៍បានច្រានបណ្ដឹងសុំនៅក្រៅឃុំនេះ នៅបន្ទាប់ពីសាលាឧទ្ធរណ៍បានជំនុំជម្រះអសាធារណៈកាលពីថ្ងៃទី៤ ខែសីហា ឆ្នាំ២០១៧។ ហើយបន្ទាប់មក ទើបមេធាវីរបស់លោក ប្តឹងបន្តឡើងមកតុលាការកំពូលជាបន្តទៀត៕

អត្ថបទ៖ ឃុត សុខឿន