គ.ជ.ប បង្ហើបកាលបរិច្ឆេទប្រកាសផ្សាយបញ្ជីបោះឆ្នោតផ្លូវការ

2018-01-17 12:35:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប បានប្រកាសពីការផ្តល់សុពលភាព និងប្រកាសផ្សព្វផ្សាយបញ្ជីបោះឆ្នោតផ្លូវការ ឆ្នាំ២០១៧ នៅវេលាម៉ោង ១០ ព្រឹក ថ្ងៃទី២៤ ខែមករា ឆ្នាំ២០១៨។ ការផ្តល់សុពលភាព និងផ្សព្វផ្សាយបញ្ជីបោះឆ្នោតផ្លូវការនេះ នឹងធ្វើឡើងនៅក្នុងកិច្ចប្រជុំ នៅទីស្តីការ គ.ជ.ប។

សេចក្តីជូនដំណឹងរបស់ គ.ជ.ប ចុះថ្ងៃទី១៧ ខែមករា ឆ្នាំ២០១៨ បង្ហាញថា កិច្ចប្រជុំផ្សព្វផ្សាយជាមួយភាគីពាក់ព័ន្ធ ស្តីពី ការផ្តល់សុពលភាព និងប្រកាសផ្សាយបញ្ជីបោះឆ្នោតផ្លូវការ ឆ្នាំ២០១៧ នាព្រឹកថ្ងៃទី២៤មករា នឹងមានការចូលរួមដោយតំណាងក្រុមប្រឹក្សាធម្មនុញ្ញ ក្រសួងពាក់ព័ន្ធនានា តំណាងគណបក្សនយោបាយ តំណាងអង្គការមិនមែនរដ្ឋាភិបាលជាតិ និងអន្តរជាតិ តំណាងស្ថានទូតជប៉ុន ជំនាញការ JICA និងជំនាញការកូរ៉េ ប្រចាំនៅ គ.ជ.ប ព្រមទាំងអ្នកសារព័ត៌មានជាតិ និងអន្តរជាតិ។

សូមរម្លឹកថា លទ្ធផលបណ្តោះអាសន្ននៃការធ្វើបច្ចុប្បន្នភាពបញ្ជីបោះឆ្នោត និងការចុះឈ្មោះបោះឆ្នោត ឆ្នាំ២០១៧ ចាប់ពីថ្ងៃទី១ ខែកញ្ញា ដល់ថ្ងៃទី៩ ខែវិច្ឆិកា ឆ្នាំ២០១៧ ត្រូវបាន គ.ជ.ប ប្រកាសថា អ្នកបោះឆ្នោតក្នុងបញ្ជីបោះឆ្នោតឆ្នាំ២០១៧ មានចំនួន ៨ ៣៨០ ២៤០ នាក់ ( ស្ត្រី ៤ ៤៧០ ៨៨២ នាក់ ) ស្មើនឹង ៨៤,៨០ % នៃចំនួនអ្នកដែលគ្រប់អាយុបោះឆ្នោត ចាប់ពី ១៨ឆ្នាំឡើងទៅចំនួន ៩ ៨៨២ ៧៤៦ នាក់។

បញ្ជីឈ្មោះអ្នកបោះឆ្នោតឆ្នាំ២០១៧ ដែល គ.ជ.ប ផ្តល់សុពលភាព និងប្រកាសផ្សាយ នាព្រឹកថ្ងៃទី២៤ ខែមករា ឆ្នាំ២០១៨ នឹងត្រូវប្រើប្រាស់ក្នុងការបោះឆ្នោតជ្រើសតាំងតំណាងរាស្ត្រ អាណត្តិទី៦ នាថ្ងៃទី២៩ ខែកក្កដា ឆ្នាំ២០១៨៕

អត្ថបទ៖ លីហៀង