គុយបា អរគុណកម្ពុជា ដែលបោះឆ្នោតគាំទ្របញ្ចប់ការហ៊ុមព័ទ្ធសេដ្ឋកិច្ច
- 2018-01-18 01:58:39
- ចំនួនមតិ 0 | ចំនួនចែករំលែក 0
គុយបា អរគុណកម្ពុជា ដែលបោះឆ្នោតគាំទ្របញ្ចប់ការហ៊ុមព័ទ្ធសេដ្ឋកិច្ច
ចន្លោះមិនឃើញ
លោក Juan Carlos Marsán Aguilera អនុប្រធានទំនាក់ទំនងអន្តរជាតិ នៃគណៈកម្មាធិការមជ្ឈឹមបក្សកុម្មុយនីសគុយបា បានថ្លែងអំណរគុណដល់កម្ពុជា ដែលបានបោះឆ្នោតគាំទ្រគុយបា លើសេចក្តីសម្រេចចិត្តរបស់អង្គការសហប្រជាជាតិស្តីពីការបញ្ចប់ការហ៊ុមព័ទ្ធសេដ្ឋកិច្ចទៅលើប្រទេសលោក។ នេះបើតាមលោក ជុំ សុន្ទរី អ្នកនាំពាក្យក្រសួងការបរទេស បានថ្លែងប្រាប់ក្រុមអ្នកកាសែតបន្ទាប់ពីជំនួបរវាងលោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងលោក Juan Carlos Marsán Aguilera កាលពីព្រឹកថ្ងៃទី១៧ ខែមករា ឆ្នាំ២០១៨ នៅទីស្តីការក្រសួង។
លោក ប្រាក់ សុខុន ក៏បានថ្លែងអំណរគុណដល់រដ្ឋាភិបាលនៃប្រទេសគុយបាវិញផងដែរ ដែលបានផ្ដល់ជំនួយដល់ប្រជាជនកម្ពុជា នៅក្នុងដំណាក់កាលដ៏លំបាក ជាពិសេសក្នុងពេលកម្ពុជាទើបរំដោះចេញពីរបបខ្មែរក្រហម ហើយនៅពេលនោះ កម្ពុជា ក៏បានជួបប្រទះនូវការហ៊ុមព័ទ្ធសេដ្ឋកិច្ចពីខាងក្រៅប្រទេស។
លោកបានបញ្ជាក់ថា ដោយសារតែការទទួលរងនូវការលំបាកដោយការហ៊ុមព័ទ្ធសេដ្ឋកិច្ចនេះ ទើបធ្វើឲ្យកម្ពុជាសម្រេចចិត្តគាំទ្រការបោះឆ្នោតរបស់អង្គការសហប្រជាជាតិស្ដីពីការបញ្ចប់ការហ៊ុមព័ទ្ធសេដ្ឋកិច្ចលើគុយបា ហើយលោកប្តេជ្ញាថា នឹងបន្តគាំទ្រតទៅទៀត។
ក្នុងកិច្ចពិភាក្សានេះ លោក Juan Carlos Marsán Aguilera ក៏បញ្ជាក់ដែរថា រដ្ឋាភិបាលគុយបា បានគោរពនូវសេចក្តីសម្រេចចិត្តរបស់កម្ពុជា ក្នុងការទប់ស្កាត់ការចង់ផ្លាស់ប្ដូររបបតាមរយៈអន្តរាគមន៍ពីបរទេស៕