Huawei ចេញវីដេអូថ្មីមួយ អួតពីបច្ចេកវិទ្យាសាកថ្មលឿនជាងមុន១០ដង

2018-01-18 02:38:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

មន្ទីរពិសោធន៍ Watt Lab របស់ Huawei បានបង្កើតបច្ចេកវិទ្យាសាកថ្មថ្មីមួយ ដែលមានល្បឿនលឿនជាងការសាកថ្មធម្មតាដល់ទៅ ១០ដងឯណោះ។

នៅក្នុងវីដេអូដែលបង្ហោះនៅលើគណនី YouTube ផ្លូវការរបស់ Huawei កាលពីម្សិលមិញ បង្ហាញថា ក្នុងរយៈពេលត្រឹម ៥នាទី ការសាកដោយប្រើបច្ចេកវិទ្យាថ្មីនេះអាចឡើងថាមពលដល់ទៅ ៤៨%។

យ៉ាងណាមិញ អ្វីគួរឲ្យសោកស្ដាយនៅក្នុងវីដេអូនេះ គឺគេសង្កេតឃើញថា ការសាកថ្មនេះមិនមែនសាកនៅលើទូរសព្ទផ្ទាល់នោះទេ ដោយតម្រូវឲ្យដកថ្មចេញទៅសាកលើដុំភ្លើងផ្សេងមួយទៀត (មើលវីដេអូចាប់ពីវិនាទី៥០)។ ជាការកត់សម្គាល់ ស្មាតហ្វូនមួយចំនួនធំនាពេលបច្ចុប្បន្នត្រូវបានផលិតឡើងដោយមិនអាចដកថ្មពីសន្ទះខាងក្រោយបានឡើយ (គេហៅថា Non-removable Battery)។

សូមបញ្ជាក់ថា វីដេអូនេះមិនមែនទើបតែបង្ហោះនោះទេ គឺ Huawei ធ្លាប់បង្ហាញកាលពី២ឆ្នាំមុនមកម៉្លេះ ដែលកាលនោះគេនៅកំពុងនិយមផលិតស្មាតហ្វូនដែលអាចដកថ្មចេញពីសន្ទះខ្នងខាងក្រោយបាន។ មួយវិញទៀត ថ្មដែល Huawei យកមកសាកនៅក្នុងវីដេអូមានទំហំត្រឹម 3000mAh ប៉ុណ្ណោះ។

យោងតាមសារព័ត៌មាន GSMArena បានធ្វើការសន្និដ្ឋានថា Huawei ប្រហែលជាចង់បង្ហាញបច្ចេកវិទ្យាសាកថ្មរហ័សនេះនៅក្នុងព្រឹត្តិការណ៍ Mobile World Congress ដែលនឹងធ្វើឡើងនៅខែកុម្ភៈក្រោយហើយ ទើបបញ្ចេញវីដេអូនេះសាជាថ្មី៕

ប្រភព៖ GSMarena ប្រែសម្រួល៖ ឈាង.