ក្រសួងកសិកម្ម និងភាគីវៀតណាម ចុះ MoU ជំរុញផលិតកម្មស្វាយចន្ទីនៅកម្ពុជា

2018-01-18 03:59:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងកសិកម្ម រុក្ខាប្រមាញ់ និងនេសាទ និងសមាគមស្វាយចន្ទីវៀតណាម បានចុះហត្ថលេខាលើអនុស្សរណៈនៃការយោគយល់គ្នា (MoU) ដើម្បីជំរុញផលិតកម្មស្វាយចន្ទីនៅកម្ពុជា សម្រាប់ការនាំចេញ កាលពីរសៀលថ្ងៃទី១៧ ខែមករា ឆ្នាំ២០១៨។

ពិធីចុះអនុស្សរណៈនេះ ធ្វើឡើងក្រោមអធិបតីភាព លោករដ្ឋមន្ត្រី វេង សាខុន និង លោក ង្វៀន ដុកថាញ់ ប្រធានសមាគមស្វាយចន្ទីវៀតណាមប្រចាំនៅកម្ពុជា និង លោក ហ័ង មិញ ឯកអគ្គរដ្ឋទូតវៀតណាមប្រចាំនៅកម្ពុជា។

ពិធីអនុស្សរណៈនៃការយោគយល់គ្នា រវាងកម្ពុជា និងភាគីវៀតណាម កាលពីម្សិលមិញ

អនុស្សរណៈនេះ នឹងជំរុញដំណាំស្វាយចន្ទីនៅកម្ពុជា ការផ្ទេរបច្ចេកទេសប្រមូលផលនិងឃ្លាំងសម្ងួត ជំរុញការវិនិយោគ ការផ្សារភ្ជាប់រវាងអ្នកដាំទៅនឹងទីផ្សារ ព្រមទាំងលើកកម្ពស់ការស្រាវជ្រាវនិងអភិវឌ្ឍន៍ ក្នុងន័យលើកកម្ពស់កម្រិតជីវភាពប្រជាកសិករ កាត់បន្ថយភាពក្រីក្រ និងជំរុញកំណើនសេដ្ឋកិច្ចជាតិ។

លោក វេង សាខុន បានមានប្រសាសន៍បញ្ជាក់ថា កាលពីឆ្នាំ២០១៦ កម្ពុជាមានលទ្ធភាពគ្រាប់ស្វាយចន្ទីបានប្រមាណជា ១០៤០០០ តោន។ លោកបន្ថែមថា កម្ពុជារំពឹងផលិតស្វាយចន្ទីឲ្យបានគ្រាប់ ១លានតោន តាមតម្រូវការទីផ្សារ។

យោងតាមសារព័ត៌មាន Vietnamplus កាលពីថ្ងៃទី១៧មករា បានឲ្យដឹងថា បច្ចុប្បន្នកម្ពុជា បានកំពុងមានដើមស្វាយចន្ទីលើផ្ទៃដីប្រមាណជា ១០ម៉ឺនហិកតា ដែលផលិតគ្រាប់ស្វាយចន្ទីបានជាង ១០តោនក្នុង១ឆ្នាំ។ ជាមួយគ្នានេះ កម្ពុជាគ្រោងពង្រីកដីដាំដុះដើមស្វាយចន្ទីរហូតដល់ ៥០-៦០ម៉ឺនហិកតា ដើម្បីសម្រេចតាមគោលដៅ៕

អត្ថបទ៖ លាភ.