អាជ្ញាធរ ហាមបក្សប្រឆាំងមិនឲ្យចូលរួមថ្លែងសារ ក្នុងពិធីគោរពវិញ្ញាណកក្ខន្ធលោក ជា វិជ្ជា ឡើយ

2018-01-18 04:23:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សាលារាជធានីភ្នំពេញ បានហាមសហជីពសេរីកម្មករកុំឲ្យតំណាងរាស្ត្រ និងមន្ត្រីអតីតគណបក្សសង្គ្រោះជាតិ ១១៨រូប ចូលរួមថ្លែងសារនយោបាយក្នុងពិធីដាក់កម្រងផ្កាគោរពវិញ្ញាណក្ខន្ធលោក ជា វិជ្ជា នៅថ្ងៃទី២២ មករា ខាងមុខនេះ។

ពិធីដាក់កម្រងផ្ការំឭកខួប ១៣ឆ្នាំ វិញ្ញាណក្ខន្ធលោក ជា វិជ្ជា នៅថ្ងៃទី២២ ខែមករា ឆ្នាំ២០១៧។

អនុប្រធានសហជីពសេរីកម្មករ លោក ម៉ាន់ សេងហាក់ ថ្លែងថា ការហាមប្រាមបែបនេះ គឺជាការរឹតត្បិតសេរីភាពការបញ្ចេញមតិ។ ប៉ុន្តែលោកថា សហជីពក៏ពុំមានគម្រោងអញ្ជើញអ្នកតំណាងរាស្ត្រនៃគណបក្សសង្គ្រោះជាតិ ចូលរួមថ្លែងសារនយោបាយនោះដែរ។

អភិបាលរងរាជធានី លោក មាន ចាន់យ៉ាដា កាលពីល្ងាចថ្ងៃពុធ ទី១៧ ខែមករា បានហៅសហជីពសេរីកម្មករប្រជុំអំពីការជូនដំណឹងធ្វើពិធីដាក់កម្រងផ្កា គោរពវិញ្ញាណក្ខន្ធលោក ជា វិជ្ជា។ ក្រៅអំពីការហាមប្រាមមិនឲ្យតំណាងរាស្ត្រគណបក្សសង្គ្រោះជាតិ ១១៨រូប ចូលរួមថ្លែងសារនយោបាយក្នុងពិធីនេះ សាលាក្រុងមិនអនុញ្ញាតឲ្យហែក្បួនឡើយ ដោយលើកហេតុថា ខ្លាចកកស្ទះចរាចរណ៍។

សហជីពសេរីកម្មករ គ្រោងរៀបចំពិធីជួបជុំដាក់កម្រងផ្កា គោរពវិញ្ញាណក្ខន្ធលោក ជា វិជ្ជា អតីតប្រធានសហជីព គម្រប់ខួប ១៤ឆ្នាំ នៅនៅថ្ងៃច័ន្ទ ទី២២ មករា ដោយមានអ្នកចូលរួមប្រមាណ ១៥០នាក់ គឺជាក្រុមគ្រួសារ សាច់ញាតិ មិត្តភ័ក្ដិ ថ្នាក់ដឹកនាំសមាជិកសហជីពសេរីកម្មករ នៅទីតម្កល់រូបសំណាកលោក ជា វិជ្ជា ខាងមុខវត្តលង្កា។

លោក ជា វិជ្ជា ជាអតីតប្រធានសហជីពសេរីកម្មករ ដែលល្បីឈ្មោះខាងទាមទារផលប្រយោជន៍ជូនកម្មករ ត្រូវបានឃាតកបាញ់សម្លាប់នៅតូបលក់កាសែតជិតវត្តលង្កា ក្រុងភ្នំពេញ កាលពីព្រឹកថ្ងៃទី២២ ខែមករា ឆ្នាំ២០០៤៕