ឡាវ នឹងមានទីផ្សារអគ្គិសនីនៅមីយ៉ាន់ម៉ា ក្រៅពីកម្ពុជា និងថៃ
- 2018-01-18 08:00:09
- ចំនួនមតិ 0 | ចំនួនចែករំលែក 0
ឡាវ នឹងមានទីផ្សារអគ្គិសនីនៅមីយ៉ាន់ម៉ា ក្រៅពីកម្ពុជា និងថៃ
ចន្លោះមិនឃើញ
ឡាវ និងមីយ៉ាន់ម៉ា គ្រោងនឹងចុះអនុស្សរណៈយោគយល់ (MoU) លើការទិញដូរអគ្គិសនី នៅក្នុងអំឡុងសប្ដាហ៍នេះ។ នេះបើយោងតាមលោក Daovong Phonekeo លេខាធិការអចិន្ត្រៃយ៍នៃក្រសួងរ៉ែ និងថាមពលឡាវ ដែលបានថ្លែងប្រាប់សារព័ត៌មានក្នុងស្រុក Vientiane Times។
លោក Daovong Phonekeo បន្តថា មុននឹងឈានទៅដល់ការទិញលក់ ភាគីមីយ៉ាន់ម៉ានឹងចាត់មន្ត្រីឲ្យមកសិក្សាអំពីលទ្ធភាពជាមុនសិន។ "មីយ៉ាន់ម៉ាចង់ទិញ (អគ្គិសនី) ប្រមាណជា ១០០ ទៅ ២០០មេហ្គាវ៉ាត់ ប៉ុន្តែនេះនឹងត្រូវផ្អែកទៅលើលទ្ធផលនៃការសិក្សារបស់ពួកគេជាមុនសិន" លោកលេខាធិការបញ្ជាក់។
គម្រោងលក់អគ្គិសនីឲ្យមីយ៉ាន់ម៉ា អាចនឹងចាប់ផ្ដើមនៅចុងឆ្នាំ២០១៨ ឬដើមឆ្នាំ២០១៩ខាងមុខ ប្រសិនបើវាដំណើរការដោយរលូន។ យ៉ាងណាមិញ ឡាវមិនទាន់បញ្ជាក់ពីតម្លៃលក់នេះទេ។
ឡាវមានសក្ដានុពលខ្ពស់លើថាមពលវារីអគ្គិសនី ដែលអាចរកចំណូលយ៉ាងសន្ធឹកដើម្បីជួយដល់ប្រទេស។ បច្ចុប្បន្ន ឡាវមានរោងចក្រថាមពលអគ្គិសនីចំនួន ៤៦ ដែលមានកម្លាំងផលិត ៦៧៥៧មេហ្គាវ៉ាត់ ប្រចាំឆ្នាំ។ ចំនួននេះអាចនឹងកើនឡើងដល់ ១ម៉ឺនមេហ្គាវ៉ាត់ នៅឆ្នាំ២០២០ និង ២ម៉ឺនមេហ្គាវ៉ាត់ នៅឆ្នាំ២០៣០។
ភាគច្រើននៃអគ្គិសនីរបស់ឡាវ ត្រូវបានលក់ទៅឲ្យប្រទេសថៃ។ ចំណែកឯ កម្ពុជាវិញក៏បានទិញអគ្គិសនីមួយចំនួនពីឡាវផងដែរ។ តួយ៉ាង កាលពីចុងឆ្នាំ២០១៧ កម្ពុជា បានប្រកាសទិញអគ្គិសនីពីឡាវ ដើម្បីបញ្ចុះតម្លៃភ្លើងនៅខេត្តព្រះវិហារ ពី ១១០០រៀលក្នុង១គីឡូវ៉ាត់ម៉ោង មកត្រឹម ៨០០រៀលក្នុង១គីឡូវ៉ាត់ម៉ោង៕