អាស៊ានរកចំណូលបានជាង ៩០ពាន់លានដុល្លារ ពីវិស័យទេសចរណ៍នៅឆ្នាំ២០១៧
- 2018-01-26 03:42:00
- ចំនួនមតិ 0 | ចំនួនចែករំលែក 0
អាស៊ានរកចំណូលបានជាង ៩០ពាន់លានដុល្លារ ពីវិស័យទេសចរណ៍នៅឆ្នាំ២០១៧
ចន្លោះមិនឃើញ
តំបន់អាស៊ាន បានទទួលចំណូលប្រមាណ ៩៣ពាន់លានដុល្លារ នៅក្នុងឆ្នាំ២០១៧។ តួលេខនេះ ត្រូវបានបង្ហាញនៅក្នុងកិច្ចប្រជុំរដ្ឋមន្រ្តីទេសចរណ៍អាស៊ានលើកទី២១ កាលពីថ្ងៃទី២៥ ខែមករា ឆ្នាំ២០១៨ នៅក្រុងឈៀងម៉ៃ ប្រទេសថៃ។
នៅឆ្នាំ ២០១៧ អាស៊ានទទួលបានទេសចរអន្តរជាតិចំនួន ១២៥លាននាក់ ក្នុងកំណើន ៨,៤% ក្នុងនោះការធ្វើដំណើរផ្ទៃក្នុងអាស៊ាន មាន ៤២% នៃទេសចរអន្តរជាតិសរុប។ អាស៊ានក៏ទទួលបានកំណើននៃរយៈពេលស្នាក់នៅមធ្យមរបស់ទេសចរអន្តរជាតិ (Average length of stay) ដែលកើនដល់ប្រមាណ ៧,៩៨ថ្ងៃផងដែរ។
នាឱកាសកិច្ចប្រជុំនេះ លោក ថោង ខុន រដ្ឋមន្រ្តីទេសចរណ៍កម្ពុជា បានគូសបញ្ជាក់ពីសារៈសំខាន់នៃការជំរុញលំហូរទេសចរផ្ទៃក្នុងអាស៊ាន (Intra-ASEAN travellers) ឲ្យមានកំណើនជាប់ជាប្រចាំ ដែលជាកត្តាកំណត់ដ៏សំខាន់នៃកំណើនទេសចរណ៍អាស៊ាន។
លោករដ្ឋមន្រ្តីក៏បានលើកឡើងពីកិច្ចខិតខំប្រឹងប្រែងរបស់កម្ពុជា ក្នុងការជំរុញការផ្សព្វផ្សាយគោលដៅទេសចរណ៍អាស៊ាន ក្នុងក្របខណ្ឌយុទ្ធនាការផ្សព្វផ្សាយឆ្នាំទស្សនាអាស៊ាន Visit ASEAN@50 នៅក្នុងពិធីបុណ្យសមុទ្រ ពិធីបុណ្យទន្លេ និងពិព័រណ៌ទេសចរណ៍កម្ពុជាអន្តរជាតិ ឆ្នាំ២០១៧ (CTM 2017) ផងដែរ៕