កម្ពុជា នឹងប្រែក្លាយពីការទិញអគ្គិសនីពីបរទេស ទៅជាការធ្វើពាណិជ្ជកម្ម

2018-01-28 07:00:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ទីន នរិន្ទ ប្រធានអាជ្ញាធរអគ្គិសនីកម្ពុជា បានបញ្ជាក់ថា នាពេលខាងមុខនេះ កម្ពុជា នឹងខិតខំអភិវឌ្ឍប្រភពអគ្គិសនីក្នុងស្រុកដែលអាចទប់ទល់នឹងតម្រូវការ ១០០% ហើយប្រែក្លាយពីការទិញអគ្គិសនីដែលពឹងផ្អែកលើដង្ហើមបរទេស ឲ្យទៅជាការធ្វើពាណិជ្ជកម្មវិញ។ លោកបានប្រាប់អ្នកកាសែតដូច្នេះ ក្រោយសន្និបាតបូកសរុបការងារបញ្ចប់ឆ្នាំ២០១៧ និងលើកទិសដៅការងារសម្រាប់ឆ្នាំ២០១៨ របស់អាជ្ញាធរអគ្គិសនីកម្ពុជា កាលពីថ្ងៃទី២៤ ខែមករា ឆ្នាំ២០១៨។

លោក ទីន នរិន្ទ ក្នុងសន្និបាតបូកសរុបការងារ កាលពីថ្ងៃទី២៤ ខែមករា ឆ្នាំ២០១៨

លោកពន្យល់ថា ប្រសិនបើការទិញអគ្គិសនីពីបរទេសចំណេញជាងការផលិតក្នុងស្រុក នោះនឹងទិញ ហើយក៏អាចបញ្ឈប់ការទិញអគ្គិសនីនេះគ្រប់ពេលបើយល់ថាខាត ប៉ុន្តែមិនមែនផ្តាច់ឈប់ទិញទាំងស្រុងនោះទេ។ «***យើងមិនមែនផ្តាច់ទេ បំណងរបស់យើងចង់ប្រែក្លាយការពឹងពាក់ ឲ្យក្លាយទៅជាពាណិជ្ជកម្មសុទ្ធសាធ មានចំណេញយើងទិញ អត់ចំណេញយើងឈប់***»។

លោក ទីន នរិន្ទ បន្ថែមថា បច្ចុប្បន្នកម្ពុជា នៅតែបន្តពឹងពាក់លើការប្រើអគ្គិសនីរបស់ប្រទេសជិតខាង ដែលធ្វើឲ្យប្រទេសទាំងនោះដំឡើងថ្លៃស្រេចតែចិត្ត។

តាមរបាយការណ៍បូកសរុបរបស់ប្រធានអាជ្ញាធរអគ្គិសនីកម្ពុជា ឲ្យដឹងថា ក្នុងឆ្នាំ២០១៧កន្លងទៅ ការនាំចូលអគ្គិសនីពីប្រទេសជិតខាងបានថយចុះពី ២២% មកត្រឹមតែ ១៨,៦% ហើយប្រភពថាមពលដែលបានប្រើប្រាស់ បានកើនឡើងដល់ចំនួន ១១%។

តាមផែនការរបស់អាជ្ញាធរអគ្គិសនី នៅត្រឹមចុងឆ្នាំ២០២០ យ៉ាងហោចណាស់ ៩៨% នៃភូមិទាំងអស់ នឹងមានអគ្គិសនីប្រើប្រាស់ចេញពីប្រភពអគ្គិសនីរបស់បណ្តាញជាតិ ដែលមានតម្លៃទាបសមរម្យ មានការអនុគ្រោះថ្លៃ មានស្ថិរភាព និងមានគុណភាព។ លោក ទីន នរិន្ទ លើកឡើងថា ភូមិជាង ២%ទៀត គឺស្ថិតនៅលើកោះក្នុងសមុទ្រ និងនៅតំបន់លិចទឹកនៃបឹងទន្លេសាបជាដើម ដែលមានការពិបាកក្នុងការភ្ជាប់ចរន្តអគ្គិសនី៕

អត្ថបទ៖ សំភី