ភូមិត្រីឆ្អើរព្រែកក្មេង ស្រុកល្វាឯម ជួបវិបត្តិខ្សត់ត្រី ៤ឆ្នាំជាប់គ្នា

2018-02-05 06:46:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រជានេសាទនៅភូមិព្រែកក្មេង ដែលជាភូមិផលិតត្រីឆ្អើរតកូនតចៅធំមួយនៅស្រុកល្វាឯម ខេត្តកណ្ដាល កំពុងជួបបញ្ហាអត់ត្រីសម្រាប់ឆ្អើរ ៤ឆ្នាំជាប់គ្នាមកហើយ។

អ្នកភូមិម្នាក់ដែលប្រកបរបរឆ្អើរត្រីតតាំងពីដូនតា និងជាអ្នកឆ្អើរត្រីធំប្រចាំភូមិ អ្នកស្រី ណន បានប្រាប់ឲ្យដឹងថា "រយៈពេល៣ ទៅ ៤ឆ្នាំនេះ ផលត្រីដែលរកមកសម្រាប់ឆ្អើរ ធ្លាក់ចុះសឹងតែរកមិនបានឆ្អើរផង ឆ្នាំនេះខ្សត់ត្រីជាងឆ្នាំទៅទៀត ឆ្នាំនេះបានតែសឹងមិនបាន ៥ពាន់ចង្កាក់ផង កាលមុនវិញមិនក្រោម ៣ទៅ ៥ម៉ឺនចង្កាក់ទេក្នុងមួយឆ្នាំៗនោះ"។

អ្នកភូមិម្នាក់ទៀតអ្នកស្រី ឈៀង នី បានលើកឡើងថា ឆ្នាំនេះរកសឹងមិនបាន ១០០ចង្កាក់ផង ខ្សត់រកមិនបាន៣-៤ឆ្នាំហើយ។

ផលត្រីធ្លាក់ចុះនេះ បណ្ដាលមកពីមូលហេតុធំ ២ ដែលអ្នកភូមិធ្វើត្រីឆ្អើរតកូនតចៅមួយនេះលើកឡើង គឺទី១ ដោយសារការនេសាទដាក់ស្បៃមុងខុសច្បាប់មានកាន់តែច្រើន និងទី២ ត្រីពុលមកពីការបាញ់ថ្នាំឈូក និងស្រែរបស់អ្នកភូមិ។

គួរបញ្ជាក់ថា ឆ្នាំនេះត្រីឆ្អើរដែលអ្នកភូមិព្រែកក្មេងនេះលក់ចេញមានតម្លៃ ៦០០រៀលក្នុងមួយចង្កាក់។ នៅភូមិព្រែកក្មេងនេះមានប្រជាជនប្រមាណ ៨០ភាគរយ ប្រកបរបរនេសាទ និងឆ្អើរត្រី និង២០ភាគរយ ជាកសិករធ្វើស្រែប្រាំង ដាំកក់ និងឈូក៕