ហេតុផលធំមួយ ធ្វើឲ្យអ្នកលក់ដើមអង្គាសីលឆ្នាំនេះ ខាតឡុងចុង
- 2018-02-09 04:57:58
- ចំនួនមតិ 0 | ចំនួនចែករំលែក 0
ហេតុផលធំមួយ ធ្វើឲ្យអ្នកលក់ដើមអង្គាសីលឆ្នាំនេះ ខាតឡុងចុង
ចន្លោះមិនឃើញ
បើគិតមកត្រឹមថ្ងៃសុក្រនេះ គឺនៅសល់តែសប្តាហ៍ទៀតទេ បុណ្យចូលឆ្នាំប្រពៃណីចិន នឹងចូលមកដល់។ ដើមផ្កាអង្គាសីលជាច្រើនដើមច្រូងច្រាង កំពុងដាក់តម្រៀបតាំងលក់ជាជួរនៅត្រើយខាងជើងស្ពានជ្រោយចង្វា ស្ថិតនៅជាប់ផ្លូវជាតិលេខ៦អា។
អ្នកលក់ដើមផ្កាអង្គាសីលនៅទីនោះ បានលើកឡើងសឹងតែដូចគ្នាថា "ចប់ហើយឆ្នាំនេះ លក់មិនដាច់ទេ"។ មូលហេតុធំមួយ ដែលធ្វើអ្នកលក់ដើមផ្កាអង្គាសីលមិនសូវដាច់ គឺដោយសារ ថ្ងៃចូលឆ្នាំចិនឆ្នាំនេះ ប៉ះចំពាក់កណ្ដាលខែ ដែលជាហេតុធ្វើឲ្យផ្ការីកជ្រុះអស់ មុនដល់ថ្ងៃចូលឆ្នាំ។
លោក ស្រស់ ស៊ីណា ដែលចាប់របរលក់ផ្កានេះ រយៈពេល ៣ឆ្នាំមកហើយនោះ បានលើកឡើងថា "ឆ្នាំនេះលក់អត់ដាច់ទេ តាំងពីលក់មក លក់បានតែ២-៣ដើមទេ។ ផ្កាឆ្នាំនេះអត់សូវមានល្អផ្កាច្រើន ណាមួយចូលឆ្នាំចិន ឆ្នាំនេះលើកមកដល់ពាក់កណ្ដាលខែទៀតផ្ការីកជ្រុះអស់បាត់ហើយ"។
ចំណែក អ្នករកស៊ីលក់ និងកាប់ដើមផ្កាអង្គាសីលជាង១០ឆ្នាំ លោក ហាន សុហេន បានលើកឡើងដូចគ្នាដែរថា ឆ្នាំនេះសង្ឃឹមរកសល់តិចណាស់ ផ្កាអត់សូវល្អ ហើយចំណាយច្រើនក្នុងការដឹកជញ្ជូនទៀត។ លោកថារហូតមកដល់ថ្ងៃនេះ លក់បានទើបតែប៉ុន្មានដើមតែទេ ផ្កាមិនចេញគេអត់ទិញ ហើយម្យ៉ាងទៀតគឺចូលឆ្នាំលើកដល់ពាក់កណ្តាលខែទៀត។
លោក ហាន សុហេន បញ្ជាក់ទៀតថា៖ "បើចូលឆ្នាំចិន ប៉ះចំថ្ងៃដើមខែថ្ងៃ៣-៤-៥ វិញ គឺគ្រប់ទឹកហើយ ព្រោះជារៀងរាល់ឆ្នាំ ផ្កានេះវាចេញផ្កាដើមខែ២ តែឆ្នាំនេះលើកមកដល់ពាក់កណ្ដាលខែអីចឹងគឺផុតខែផ្កាហើយ។ ដើមផ្កាអង្គាសីលនេះ តែដល់ផុតថ្ងៃចូលឆ្នាំហើយគឺ ធ្វើអុសដុតហើយ"។
សូមបញ្ជាក់ថាសម្រាប់ឆ្នាំ២០១៨នេះ បុណ្យចូលឆ្នាំចិន គឺត្រូវចំថ្ងៃ១៦-១៧-១៨ ខែកុម្ភៈ ដែលសប្ដាហ៍ទី២នៃខែកុម្ភៈ៕