ផ្លូវដែកពីក្រុងបាងកក មកដល់ក្រុងសិរីសោភ័ណ ត្រូវបានតភ្ជាប់រួចរាល់ជាស្ថាពរ

2018-02-13 23:56:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងសាធារណការ និងដឹកជញ្ជូន បានប្រកាសថា ផ្លូវដែកកម្ពុជា-ថៃ ដែលភ្ជាប់ពីក្រុងបាងកក មកដល់ ក្រុងសិរីសោភ័ណ ខេត្តបន្ទាយមានជ័យ ត្រូវបានសាងសង់រួចរាល់ជាស្ថាពរហើយ កាលពីថ្ងៃទី១៣ ខែកុម្ភៈ ឆ្នាំ២០១៨។

ផ្លូវដែកភ្ជាប់ពីក្រុងបាងកក-ក្រុងសិរីសោភ័ណ (រូបថត៖ ក្រសួងសាធារណការ)

ដើម្បីឆ្លើយតប និងការចូលរួមកាត់បន្ថយចំណាយលើការដឹកជញ្ជូន និងកាត់បន្ថយគ្រោះថ្នាក់ព្រមទាំងការកកស្ទះចរាចរណ៍ ក្រសួងសាធារណការ គ្រោងដាក់ដំណើរការសាកល្បង នូវការផ្តល់សេវាដឹកជញ្ជូនតាមផ្លូវដែកនេះនៅមុនឱកាសបុណ្យចូលឆ្នាំខ្មែរ នាខែមេសាខាងមុខនេះ។

ការសម្រេចតភ្ជាប់ផ្លូវដែកពីបាងកក មកដល់សិរីសោភ័ណនេះ ខណៈពេលដែលស្ថានីយរថភ្លើងអន្តរជាតិប៉ោយប៉ែត នឹងត្រូវបញ្ចប់ការជួសជុលទាំងស្រុងនៅមុនបុណ្យចូលឆ្នាំខ្មែរផងដែរ។

សូមរម្លឹកថា កិច្ចព្រមព្រៀងតភ្ជាប់ផ្លូវដែករវាងកម្ពុជា និងថៃ ត្រូវបានធ្វើឡើងដោយប្រមុខរាជរដ្ឋាភិបាលនៃប្រទេសទាំង២ កាលពីចុងឆ្នាំ២០១៥។ ការតភ្ជាប់ផ្លូវដែកនេះ ត្រូវបានរំពឹងថា នឹងបង្កើនទំហំពាណិជ្ជកម្មទ្វេភាគី ដល់ ២០ពាន់លានដុល្លារ ត្រឹមឆ្នាំ២០២០។

ផ្លូវដែកភ្ជាប់ពីក្រុងបាងកក-ក្រុងសិរីសោភ័ណ (រូបថត៖ ក្រសួងសាធារណការ)

សូមជម្រាបថា ដំណាក់កាលនៃការកសាងផ្លូវដែកនេះ គឺចាប់ផ្តើមពីប៉ោយប៉ែត ទៅសិរីសោភ័ណ ពីសិរីសោភ័ណ ទៅបាត់ដំបង ពីបាត់ដំបង ទៅពោធិ៍សាត់ ហើយនឹងបន្តភ្ជាប់មកដល់រាជធានីភ្នំពេញ។

បើតាមការបញ្ជាក់របស់ប្រធានមន្ទីរសាធារណការ និងដឹកជញ្ជូន ខេត្តបន្ទាយមានជ័យលោក គឹម សុវណ្ណ កាលពីថ្ងៃទី២៤ ខែមករា ឆ្នាំ២០១៨ថា ក្រសួងសាធារណការ គ្រោងបញ្ចប់ការសាងសង់ផ្លូវរថភ្លើង ពីរាជធានីភ្នំពេញ ទៅក្រុងប៉ោយប៉ែតដែលមានប្រវែងជាង៣០០គីឡូម៉ែត្រ យ៉ាងយូរត្រឹមខែកក្កដា ឆ្នាំ២០១៨ខាងមុខ។ ចំណែកឯការបើកដំណើរការផ្លូវរថភ្លើងឆ្លងកាត់កម្ពុជា-ថៃ នៅមិនទាន់បានកំណត់ជាក់លាក់នៅឡើយ។ ប៉ុន្តែក្នុងជំនួបរវាង សម្តេចនាយករដ្ឋមន្ត្រី ហ៊ុន សែន និងនាយករដ្ឋមន្ត្រីថៃលោក ប្រាយុទ្ធ ចាន់អូចា នៅរាជធានីភ្នំពេញ កាលពីថ្ងៃទី១០ មករា ឆ្នាំ២០១៨ បានបញ្ជាក់ថា ផ្លូវរថភ្លើងពីបាងកកមកភ្នំពេញ នឹងបើកដំណើរការនៅឆ្នាំ២០២០៕

អត្ថបទ៖ សំភី