ហុងគ្រី មិនគាំទ្រសេចក្តីសម្រេចដែលមានចេតនាដាក់ទណ្ឌកម្មលើកម្ពុជាឡើយ

2018-02-19 12:09:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រទេសហុងគ្រី នឹងគាំទ្រដល់ប្រទេសកម្ពុជា ទាំងផ្លូវការ និងក្រៅផ្លូវការ នៅក្នុងសហភាពអឺរ៉ុប សម្រាប់បញ្ហានានា ដែលទាក់ទងនឹងការប្តេជ្ញាចិត្តរបស់សភាអឺរ៉ុបលើកម្ពុជា នឹងផ្តល់ការគាំទ្រកម្ពុជា ពិសេសនឹងមិនគាំទ្រសេចក្តីសម្រេចណាដែលមានចេតនាដាក់ទណ្ឌកម្មលើកម្ពុជា នៅក្នុងសភាអឺរ៉ុបឡើយ។ នេះបើតាមការបញ្ជាក់របស់លោក Zsolt Semjén ឧបនាយករដ្ឋមន្ត្រី នៃប្រទេសហុងគ្រី នៅក្នុងជំនួបពិភាក្សាជាមួយលោកឧបនាយករដ្ឋមន្ត្រី ហោ ណាំហុង កាលពីថ្ងៃទី១៦ ខែកុម្ភៈ ឆ្នាំ២០១៨ នៅវិមានរដ្ឋសភា រដ្ឋធានីប៊ុយដាប៉ែស ប្រទេសហុងគ្រី។

ការលើកឡើងនេះ គឺឆ្លើយតបទៅនឹងលោក ហោ ណាំហុង ដែលបានស្នើសុំការគាំទ្រពីហុងគ្រី ដើម្បីកុំឱ្យសហភាពអឺរ៉ុបដាក់ទណ្ឌកម្មប្រឆាំងនឹងកម្ពុជា។

លោក Zsolt Semjén បានបញ្ជាក់ថា ហុងគ្រីគោរពរបៀបអនុវត្តតាមលក្ខណៈប្រទេសរៀងៗខ្លួន។ ប្រទេសហុងគ្រីមាន គោលនយោបាយបើកចំហរឆ្ពោះទិសខាងកើត គិតទាំងកិច្ចសហប្រតិបត្តិការ ជាមួយ ចិន រុស្ស៊ី និងអាស៊ាន ជាពិសេសកម្ពុជា។

លោកបន្តថា ប្រទេសហុងគ្រី គឺជាផ្នែកមួយនៃ VISIGRAD (ប៉ូឡូញ ហុងគ្រី ស្លូវ៉ាគី និងសាធារណរដ្ឋឆេក) ដែលបច្ចុប្បន្នជា "ក្បាលម៉ាស៊ីន" នៃសហភាពអឺរ៉ុប។ ប្រទេសទាំងបួនមានឥទ្ធិពលសេដ្ឋកិច្ចយ៉ាងខ្លាំងនៅក្នុងសហភាពអឺរ៉ុប។

សូមជម្រាបថា លោក ហោ ណាំហុង បានដឹកនាំគណៈប្រតិភូកម្ពុជាមកចូលរួម “កិច្ចប្រជុំគណៈកម្មាធិការប្រតិបត្តិ នៃអង្គការអ្នកប្រជាធិបតេយ្យនិយមកណ្ដាល” (Executive Committee Meeting of Centrist Democrat International – CDI) នៅរដ្ឋធានីប៊ុយដាប៉ែស ប្រទេសហុងគ្រី ពីថ្ងៃទី១៥-១៧ កុម្ភៈ ២០១៨។ ក្នុងឱកាសនេះដែរ លោកក៏បានជួបពិភាក្សាជាមួយលោក Viktor Orbán នាយករដ្ឋមន្ត្រីនៃប្រទេសហុងគ្រីផងដែរ៕

អត្ថបទ៖ សោភា