អ្នករត់កង់បីម្នាក់ នៅសៀមរាប ប្រើបណ្តាញសង្គម ទាក់ទាញភ្ញៀវជិះមិនចេះដាច់

2018-02-25 07:33:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អ្នករត់កង់បី ឬរ៉ឺម៉កទេសចរណ៍១រូប នៅខេត្តសៀមរាប រកប្រាក់បានច្រើន ព្រោះមានភ្ញៀវជិះមិនចេះដាច់ រហូតដល់ពេលខ្លះ ត្រូវរំលែកភ្ញៀវឲ្យទៅអ្នករត់រ៉ឺម៉កផ្សេងទៀតក៏មាន។ ការរកបានភ្ញៀវច្រើនបែបនេះ ព្រោះតែ អ្នករត់កង់បី រូបនេះ ចេះប្រើប្រាស់បណ្ដាញសង្គមផ្សេងៗ រួមមាន ហ្វេសបុក, Viber, Wechat ជាដើម។

១. លោក ដា ម៉ៅ អាយុ២៩ឆ្នាំ ជាអ្នកប្រកបរបរបើក រ៉ឺម៉កទេសចរណ៍ នៅខេត្តសៀមរាប។ លោកចាប់ផ្ដើមអាជីពនេះតាំងពីឆ្នាំ ២០០៩ មកម្ល៉េះ។

២. ផ្ទុយពីអ្នកបើករ៉ឺម៉កផ្សេងទៀតដែលតែងតែនិយមស្វែងរកភ្ញៀវជាតិតាមទីសាធារណៈដោយផ្ទាល់ លោក ដា ម៉ៅ ឈានទៅមុខមួយជំហានក្នុងការទាក់ទងភ្ញៀវអន្ដរជាតិ ដោយប្រើប្រាស់បណ្ដាញព័ត៌មានសង្គមផ្សេងៗរួមមាន៖ វេបសាយ ហ្វេសប៊ុក Viber, Wechat...។

៣. តាមរយៈបណ្ដាញសង្គម លោក ដា ម៉ៅ ទទួលបានភ្ញៀវអន្ដរជាតិជាប់ជាហូរហែ និងច្រើនគួរឲ្យកត់សម្គាល់ រហូតដល់ពេលខ្លះ លោកត្រូវរំលែកភ្ញៀវដែលទទួលបានទៅឲ្យអ្នករត់រ៉ឺម៉កផ្សេងក៏មាន។

៤. បន្ថែមលើកការដឹកភ្ញៀវទៅកាន់រមណីយដ្ឋាននានា លោក មានសមត្ថភាពពន្យល់ប្រាប់ភ្ញៀវអំពីព័ត៌មានផ្សេងៗ ទាក់ទងនឹងតំបន់ទេសចរណ៍នានាក្នុងខេត្តសៀមរាប អាចថតរូបបានស្អាត។ សម្រាប់លោក ដា ម៉ៅ ភ្ញៀវមិនត្រឹមតែជាអតិថិជនទេ តែជាមិត្តភក្តិ ជាក្រុមគ្រួសារ ដែលលោកយកចិត្តទុកដាក់បំផុតផងដែរ។

៥. សេវាកម្មរបស់លោកធ្វើឲ្យភ្ញៀវទេសចរមានភាពកក់ក្ដៅ សប្បាយរីករាយ និងអាចបំពេញបំណងភ្ញៀវគ្រប់ពេលវេលាគ្រប់ទីកន្លែង។ ការណ៍នេះធ្វើឲ្យសេវារបស់លោកល្បីល្បាញក្នុងចំណោមភ្ញៀវទេសចរមួយចំនួន ដែលចង់មកលេងខេត្តសៀមរាបជាលក្ខណៈឯកជន។ ហើយចុងក្រោយ នៅឆ្នាំ២០១៧ លោកទទួលបានវិញ្ញាបនបត្រកម្រិតផ្កាយ៥ (Certificate of Excellent) ពីគេហទំព័រ Trip Advisor ដ៏ល្បីល្បាញទៀតផង៕

អត្ថបទ៖ ក្រុមការងារផ្លូវទៅស្រុក