រង្វង់មូលថ្មីតម្លៃជាង ៥០ម៉ឺនដុល្លារ នឹងលេចរូបរាងនៅក្រុងប៉ោយប៉ែត
- 2018-02-26 09:02:59
- ចំនួនមតិ 0 | ចំនួនចែករំលែក 0
រង្វង់មូលថ្មីតម្លៃជាង ៥០ម៉ឺនដុល្លារ នឹងលេចរូបរាងនៅក្រុងប៉ោយប៉ែត
ចន្លោះមិនឃើញ
ដើម្បីលើកកម្ពស់សោភណ្ឌភាព និង បង្អួតអត្តសញ្ញាណជាតិខ្មែរជូនភ្ញៀវអន្តរជាតិ រង្វង់មូលថ្មីមូលថ្មីនៅក្រុងប៉ោយប៉ែត ខេត្តបន្ទាយមានជ័យ បានបើកការដ្ឋានសាងសង់ហើយកាលពីថ្ងៃទី២៣ ខែកុម្ភៈ ឆ្នាំ២០១៨។ រង្វង់មូលថ្មីនេះរំលេចដោយប្រាង្គប្រាសាទអង្គរវត្ត ប្រាសាទព្រះវិហារ បន្ទាយស្រី ដើមត្នោត ព្រមទាំងឈ្មោះរាជធានី នៃខេត្តទាំង២៥ របស់កម្ពុជា។
លោក សាន ស៊ានហូ អភិបាលក្រុងប៉ោយប៉ែត បានមានប្រសាសន៍ថា ការសាងសង់រង្វង់មូលធ្វើឡើង ដោយរំកិលប្រាសាទកំពូលបីពីក្លោងទ្វារមុខទីស្នាក់ការត្រួតពិនិត្យច្រកទ្វារព្រំដែនអន្តរជាតិចាស់ យកមកតម្កល់ ដោយរៀបចំគម្រោងប្លង់ទម្រប្រាសាទខាងលើបន្ថែមរចនាបទជាប្រាង្គប្រាសាទចំនួន ៥ថ្នាក់។ ក្នុងនោះថ្នាក់នីមួយៗតម្កល់រូបបដិមាផ្សេងៗ ទុកជាទីសក្ការតាមទំនៀមទម្លាប់ សាសនា និងរចនាបថស្ថាបត្យកម្មតាមប្រពៃណីខ្មែរយើង។
ការស្ថាបនាត្រូវចំណាយរយៈពេល៦ខែ ដោយធ្វើទាំងថ្ងៃទាំងយប់ ហើយការចំណាយអស់ថវិកាប្រមាណ ៥០ម៉ឺនដុល្លារអាមេរិក។
ច្រកទ្វារអន្តរជាតិក្រុងប៉ោយប៉ែត ដែលមានទីតាំងជាប់នឹងស្រុកអារញ្ញប្រាថេតរបស់ប្រទេសថៃ គឺជាច្រកដ៏សំខាន់មួយរបស់កម្ពុជា។ បច្ចុប្បន្នភាព ក្រៅពីការដោះដូរទំនិញ ច្រកមួយនេះបានដើរតួនាទីដ៏សំខាន់សម្រាប់ការចេញចូលរបស់អ្នកទេសចរអន្តរជាតិផងដែរ៕