លោក Duterte ប្រកាសមិនចូលរួមកិច្ចប្រជុំកំពូលអាស៊ាន-អូស្រ្តាលី

2018-03-05 09:45:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក Rodrigo Duterte ប្រធានាធិបតីហ្វីលីពីន បានប្រកាសថា លោក អាចនឹងមិនចូលរួមប្រជុំកំពូលតំបន់អាស៊ាន នៅទីក្រុង Sydney ប្រទេសអូស្រ្តាលី ដែលត្រូវប្រារព្ធ ធ្វើនៅថ្ងៃ ១៧-១៨ ខែមីនា ឆ្នាំ ២០១៨ខាងមុខនេះ ដោយសារហេតុថា "លោកត្រូវរក្សាវត្តមាននៅក្នុងប្រទេស ដោយមិនអាចអត់បាន" ។ នេះបើតាមការថ្លែងរបស់លោក Harry Roque អ្នកនាំពាក្យរបស់លោក Duterte។

លោក Roque បានបន្តទៀតថា "លោកប្រធានាធិបតី ពិតជាមានការសោកស្តាយ ដែលលោកនឹងមិនបានទៅចូលរួមកិច្ចប្រជុំកំពូល អាស៊ាន-អូស្ត្រាលី នៅក្នុងខែមីនានេះឡើយ។ ស្ថានការណ៍វិវឌ្ឍន៍នៅក្នុងប្រទេស តម្រូវជាចាំបាច់ឲ្យលោកប្រធានាធិបតី រក្សាវត្តមាននៅក្នុងប្រទេសហ្វីលីពីន" ។

លើសពីនេះ លោក Duterte នឹងបញ្ជូនលោក Alan Peter Cayetano រដ្ឋមន្ត្រីក្រសួងការបរទេសហ្វីលីពីន ជាតំណាងទៅកាន់អង្គប្រជុំកំពូលនេះ ខណៈដែរលោក ប្រធានាធិបតី Duterte នឹងចូលរួមកម្មវិធីចែកសញ្ញាបត្រ នៅសាលារាជបណ្ឌិតសភាកងទ័ពហ្វីលីពីន។ ហើយលោក ក៏គ្រោងនឹងយកកម្មវិធីនេះ ដើម្បីនិយាយទៅកាន់មន្រ្តីនរគបាលវ័យក្មេង អំពីការប្រយុទ្ធប្រឆាំងទៅនឹង "អំពើភេរវកម្មនាសម័យទំនើប" ផងដែរ។

គូសបញ្ជាក់ថា ប្រទេសអូស្រ្តាលី គឺស្ថិតក្នុងចំណោមប្រទេសជាច្រើន ដែលធ្វើការរិះគន់លោក Duterte ពាក់ព័ន្ធនឹងការសម្លាប់ប្រជាជនហ្វីលីពីនរាប់ពាន់នាក់ក្រៅប្រព័ន្ធច្បាប់ ក្នុងសង្រ្គាមប្រឆាំងនឹងគ្រឿងញៀនរបស់លោក Duterte នៅអង្គប្រជុំគណកម្មការសិទ្ធិមនុស្សរបស់ UN ក្នុងទីក្រុងGeneva ប្រទេសស្វីស កាលពីឆ្នាំមុន។

ប្រភព៖ The Jakarta Post ប្រែសម្រួល៖ អឹុម ម៉េងស៊ាង