សម្ដេច ហ៊ុន សែន ស្វាគមន៍កិច្ចសន្ទនារវាងកូរ៉េខាងជើង និងកូរ៉េខាងត្បូង
- 2018-03-12 01:37:03
- ចំនួនមតិ 0 | ចំនួនចែករំលែក 0
សម្ដេច ហ៊ុន សែន ស្វាគមន៍កិច្ចសន្ទនារវាងកូរ៉េខាងជើង និងកូរ៉េខាងត្បូង
ចន្លោះមិនឃើញ
សម្ដេច ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានសម្ដែងនូវការស្វាគមន៍ចំពោះសភាពការណ៍វិវត្តន៍ថ្មីៗនូវឧបទ្វីបកូរ៉េពិសេសចំពោះកិច្ចសន្ទនាកាន់តែល្អប្រសើររវាងប្រទេសកូរ៉េខាងជើង និងកូរ៉េខាងត្បូងនោះ។ ការថ្លែងរបស់សម្ដេចនាយករដ្ឋមន្ត្រី បានធ្វើឡើងក្នុងពិធីបើកជាផ្លូវការបុណ្យទន្លេលើកទី៤ ឆ្នាំ២០១៨ នៅក្រុងតាខ្មៅ ខេត្តកណ្ដាល កាលពីចុងសប្ដាហ៍មុន។
សម្ដេចតេជោថ្លែងថា "ក្នុងឋានៈជារដ្ឋអធិបតេយ្យ ជាសមាជិកនៃអង្គការសហប្រជាជាតិ ក្នុងនាមរាជរដ្ឋាភិបាលកម្ពុជា ខ្ញុំពិតជាមានការរីករាយ ដែលបានទទួលនូវដំណឹងដ៏ល្អ ទាក់ទងជាមួយនឹងកិច្ចសន្ទនាកាន់តែល្អប្រសើរ រវាងកូរ៉េខាងជើង និងកូរ៉េខាងត្បូង។ នេះក៏ជាបញ្ហាដ៏សំខាន់មួយ ដែលធ្វើឲ្យការព្រួយបារម្ភនៅក្នុងតំបន់ និងអន្តរជាតិ កាន់តែមានភាពធូរស្រាល ដែលកាត់បន្ថយពីភាពតានតឹងមកកាន់ភាពធូរស្រាល"។
សម្ដេចតេជោបន្ថែមថា ប៉ុន្តែអ្វីដែលសំខាន់ជាងនេះ ប្រសិនបើរឿងនេះ វាបានកើតមែនពិតប្រាកដ គឺកិច្ចសន្ទនារវាងប្រធានាធិបតីសហរដ្ឋអាមេរិក ដូណាល់ត្រាំ ជាមួយនឹងមេដឹកនាំកូរ៉េខាងជើង គឹម ជុងអ៊ុន គឺជាសារនយោបាយ ដែលកំពុងទាក់ទាញនៅលើពិភពលោក មិនគ្រាន់តែប្រទេសមហាអំណាច និងប្រទេសដែលនៅជិតខាងកូរ៉េប៉ុណ្ណោះទេ ក៏ប៉ុន្តែទាក់ទាញប្រទេសនានានៅលើពិភពលោកឲ្យយកចិត្តទុកដាក់ទៅដល់សារៈសំខាន់ នៃបញ្ហាទំនាក់ទំនងសន្ទនារវាងសហរដ្ឋអាមេរិក និងកូរ៉េខាងជើងផងដែរ៕