Chung Eui-yong បុរសម្នាក់ នៅពីក្រោយការឯកភាពជួបគ្នារវាង ដូណាល់ ត្រាំ និង គឺម ជុងអ៊ុន

2018-03-13 02:29:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ដំណឹងស្ដីពីការឯកភាពជួបពិភាក្សាគ្នារវាងប្រធានាធិបតីអាមេរិក ដូណាល់ ត្រាំ និងមេដឹកនាំកូរ៉េខាងជើង គីម ជុងអ៊ុន បានធ្វើឲ្យឧបទ្វីបកូរ៉េ និងពិភពលោក សម្ដែងការសាទរ និងរីករាយ។ ប៉ុន្ដែមានបុរសម្នាក់ ដែលនាំឲ្យមានការឯកភាពជួបពិភាក្សាគ្នាជាប្រវត្តិសាស្រ្តរវាងមេដឹកនាំទាំងពីរនេះ នោះគឺលោក Chung Eui-yong។ តើលោក Chung Eui-yong ជានរណា? តើគាត់បាន និងកំពុងធ្វើអ្វីខ្លះ ទើបមានការឯកភាពជួបគ្នារវាង ដូណាល់ ត្រាំ និង គឺម ជុងអ៊ុន?

លោក Chung Eui-yong (នៅកណ្ដាល)

លោក Chung Eui-yong គឺជាទីប្រឹក្សាសន្ដិសុខជាតិកូរ៉េខាងត្បូង របស់ប្រធានាធិបតី Moon Jae-in។ មុនឈានដល់ការឯកភាពជួបពិភាក្សាគ្នារវាង ដូណាល់ ត្រាំ និង គឺម ជុងអ៊ុន នៅដើមខែមីនា ២០១៨ លោក Chung Eui-yong បានធ្វើដំណើរទៅកាន់ប្រទេសកូរ៉េខាងជើង ដោយបានយកសារលិខិតរបស់ប្រធានាធិបតីកូរ៉េខាងត្បូង ទៅប្រគល់ជូនលោក គីម ជុងអ៊ុន ព្រមទាំងបានពិភាក្សាជាមួយមេដឹកនាំកូរ៉េខាងជើងផងដែរ។

បន្ទាប់មកទៀត គឺនៅសប្ដាហ៍មុន លោក Chung Eui-yong បានធ្វើដំណើរទៅក្រុងវ៉ាស៊ីនតោន ដោយបានជួបពិភាក្សាជាមួយប្រធានាធិបតី ដូណាល់ ត្រាំ។ ក្រោយជំនួបពិភាក្សានោះ លោក Chung Eui-yong បានប្រកាសនៅក្នុងសន្និសីទសារព័ត៌មាននាសេតវិមានថា ប្រធានាធិបតី ដូណាល់ ត្រាំ បានទទួលជួបពិភាក្សាគ្នាដោយផ្ទាល់ជាមួយមេដឹកនាំ គឺម ជុងអ៊ុន ហើយ។

ចំណែកនៅថ្ងៃទី១២ ខែមីនា ម្សិលមិញ លោក Chung Eui-yong បានបន្ដដំណើរទៅក្រុងប៉េកាំង របស់ចិនទៀត ដោយបានជួបពិភាក្សាជាមួយប្រធានាធិបតីចិន ស៊ី ជីងពីង ស្ដីពីបញ្ហាឧបទ្វីបកូរ៉េ និងជំនួបរវាង ដូណាល់ ត្រាំ និង គឺម ជុងអ៊ុន។

ពីក្រុងសេអ៊ូល ទៅក្រុងព្យុងយ៉ាង ក្រុងវ៉ាស៊ីនតោន និងចុងក្រោយក្រុងប៉េកាំង លោក Chung Eui-yong បានជួបពិភាក្សាជាមួយកំពូលមេដឹកនាំពិភពលោក ដើម្បីធ្វើឲ្យគម្រោងជួបគ្នារវាង ដូណាល់ ត្រាំ និង គឺម ជុងអ៊ុន ទៅជាការពិត សម្រាប់សន្ដិភាព និងស្ដិរភាពនៅឧបទ្វីបកូរ៉េ និងពិភពលោក។

សូមបញ្ជាក់ថា ជំនួបរវាង ដូណាល់ ត្រាំ និង គីម ជុងអ៊ុន គ្រោងធ្វើឡើងនៅខែឧសភា ២០១៨ ប៉ុន្ដែពុំទាន់បញ្ជាក់ពីទីតាំងនៃជំនួបនោះនៅឡើយទេ៕

ប្រភព៖ CGTN ប្រែសម្រួល៖ វាសនា