ជំនួបរវាងរដ្ឋមន្ត្រីមហាផ្ទៃជាមួយអ្នករាយការណ៍ពិសេស UN ផ្តោតលើ៥ចំណុចសំខាន់

2018-03-13 02:49:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេច ស ខេង រដ្ឋមន្ត្រីក្រសួងមហាផ្ទៃ បានជួបពិភាក្សាការងារជាមួយអ្នកស្រី រ៉ូណា ស្មីត អ្នករាយការណ៍ពិសេសរបស់អង្គការសហប្រជាជាតិ កាលពីរសៀលថ្ងៃទី១២ ខែមីនា ឆ្នាំ២០១៨ នៅទីស្តីការក្រសួងមហាផ្ទៃ។ លោកឧត្តមសេនីយ៍ទោ ផាត សុផានិត ប្រធាននាយកដ្ឋានទំនាក់ទំនងអន្តរជាតិ បានថ្លែងប្រាប់ក្រុមអ្នកកាសែតបន្ទាប់ពីជំនួបចប់ថា មានបញ្ហាធំៗចំនួន៥ ដែលអ្នកស្រីបានលើកឡើងក្នុងជំនួបនេះ។

ទី១. ពាក់ព័ន្ធនឹងការរៀបចំច្បាប់៖ អ្នកស្រីចង់ដឹងពីបច្ចុប្បន្នភាពនៃសេចក្តីព្រាងច្បាប់ស្តីពីការប្រយុទ្ធប្រឆាំងបទល្មើសបច្ចេកវិទ្យា។ សម្តេច ស ខេង បានជម្រាបជូនថា រហូតមកដល់ពេលនេះ ក្រសួងមហាផ្ទៃ មិនទាន់បានធ្វើអ្វី ឲ្យមានវឌ្ឍនភាពអ្វីច្រើនទៅលើបញ្ហាច្បាប់នេះទេ ដោយសារស្ថិតនៅក្នុងដំណាក់កាលសិក្សានៅឡើយ។

ទី២. អ្នកស្រី រ៉ូណា ស្មីត បានលើកឡើងអំពីតួនាទីរបស់ក្រសួងមហាផ្ទៃ ក្នុងការអនុវត្តច្បាប់ដូចជាច្បាប់គណបក្សនយោបាយ ច្បាប់សមាគម និងអង្គការមិនមែនរដ្ឋាភិបាល និងច្បាប់ស្តីពីការធ្វើបាតុកម្មដោយសន្តិវិធី។ សម្តេច ស ខេង បានបញ្ជាក់ថា ការរៀបចំច្បាប់ទាំងអស់នេះ គឺមិនមែនក្នុងន័យរិតត្បិតសិទ្ធិសេរីភាពរបស់ប្រជាពលរដ្ឋនោះទេ។ ចំពោះការរំលាយគណបក្សសង្គ្រោះជាតិ សម្តេច ស ខេង បានពន្យល់ថា ការរំលាយនេះ គឺជាសកម្មភាពរបស់គណបក្សខ្លួនឯងទេ ដែលបានអនុវត្តផ្ទុយនឹងច្បាប់។ ពាក់ព័ន្ធនឹងច្បាប់សមាគម និងអង្គការមិនមែនរដ្ឋាភិបាល គឺអង្គការដែលមិនអនុវត្តស្របតាមលក្ខន្តិកៈ នៃច្បាប់សមាគម និងអង្គការមិនមែនរដ្ឋាភិបាល គឺនឹងត្រូវវទទួលនូវការពិន័យផ្សេងៗ ដូចជាការផ្អាកសកម្មភាព និងការបង់ផាកពិន័យផ្សេងៗ។ ពាក់ព័ន្ធនឹងច្បាប់ស្តីពីការធ្វើបាតុកម្មដោយសន្តិវិធី គឺធ្វើយ៉ាងណាដើម្បីរក្សាសន្តិសុខ សុវត្ថិភាព មិនមានគោលបំណងក្នុងការបិទសិទ្ធិសេរីភាពរបស់ប្រជាពលរដ្ឋនោះទេ។

ទី៣. អ្នកស្រី រ៉ូណា ស្មីត បានលើកឡើងអំពីភាពចង្អៀតណែននៅក្នុងពន្ធនាគារ តាមរយៈការអនុវវត្ត នៃយុទ្ធនាការបង្ក្រាបបទល្មើសគ្រឿងញៀន ដោយអ្នកស្រីសម្តែងក្តីបារម្ភពីសុខុមាលភាពរបស់អ្នកជាប់ឃុំនៅក្នុងពន្ធនាគារ។ សម្តេច ស ខេង បានលើកឡើងថា រាជរដ្ឋាភិបាលខិតខំប្រឹងប្រែងធ្វើយ៉ាងណាបង្ក្រាបបទល្មើសផង និងគិតដល់ការស្តារនីតិសម្បទាអ្នកជាប់ឃុំផងដែរ។

ទី៤. អ្នកស្រី រ៉ូណា ស្មីត បានលើកអំពីការយល់ដឹងច្បាប់របស់អាជ្ញាធរនៅមូលដ្ឋាន ដោយមានការយល់ឃើញ និងការអនុវត្តខុសៗគ្នាទៅលើច្បាប់នៅក្នុងថ្នាក់មូលដ្ឋាន។ សម្តេច ស ខេង បានបញ្ជាក់ថា ការអនុវត្តច្បាប់នៅមូលដ្ឋាននេះ សម្តេចបានណែនាំទៅដល់អាជ្ញាធរថ្នាក់មូលដ្ឋានធ្វើយ៉ាងណាអនុវត្តទៅតាមស្មារតីនៃច្បាប់ ឬក៏គោលការណ៍ណែនាំរបស់ក្រសួង។

ទី៥. អ្នកស្រី រ៉ូណា ស្មីត បានជម្រាបសួរសម្តេច ស ខេង ថា «មានបានទទួលព័ត៌មានអ្វីបន្ថែមនៅខេត្តក្រចេះទេ?»។ សម្តេច ស ខេង បានឆ្លើយតបថា រហូតមកដល់ពេលនេះ សម្តេចបានទទួលរបាយការណ៍បឋមមួយចំនួនដែរ និងបានចាត់ក្រុមអធិការទៅធ្វើការស្រាវជ្រាវបន្ថែមហើយ៕

អត្ថបទ៖ សោភា