មេធាវីជឿជាក់ថា អ្នកវាយលោកបណ្ឌិតស៊ុយ សារ៉េត នឹងមិនរួចខ្លួន ព្រោះហេតុផល ៥យ៉ាង

2018-03-13 13:10:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោកមេធាវី ឈី សម្បត្តិ បានអះអាងថា ក្រុមអ្នកប្រើអំពើហិង្សាលើលោកសាស្រ្ដាចារ្យបណ្ឌិត ស៊ុយ សារ៉េត នឹងមិនរួចខ្លួនពីសំណាញ់ច្បាប់នោះទេ។ មេធាវីរបស់លោកស៊ុយ សារ៉េត រូបនេះ បានលើកហេតុផលសំខាន់ៗចំនួន ៥ ដូចខាងក្រោមនេះ៖

១. វីដេអូដែលបង្ហោះចែកចាយលើបណ្ដាញសង្គម៖ នៅក្នុងវីដេអូឃ្លីបនោះ បានបង្ហាញពីសកម្មភាពដ៏ឃោរឃៅ និងអត្តសញ្ញាណរបស់ក្រុមអ្នកប្រើអំពើហិង្សាទាំងនោះយ៉ាងច្បាស់ ដូច្នេះគ្មានអ្វីជាឧបសគ្គក្នុងការស្រាវជ្រាវរកនោះទេ។

២. រូបថត៖ ក្រៅពីវីដេអូសកម្មភាព លោកមេធាវី ឈី សម្បត្តិ ប្រាប់ទៀតថា ក្នុងដៃសមត្ថកិច្ច គឺមានរូបថតជនបង្កទាំងអស់ ដែលសុទ្ធជាអ្នកចូលរួមក្នុងការប្រើអំពើហិង្សានោះ។

លោកសាស្រ្ដាចារ្យបណ្ឌិត ស៊ុយ សារ៉េត

៣. សមត្ថកិច្ចកំពុងដុតដៃដុតជើងយ៉ាងខ្លាំង៖ លោកមេធាវីលើកឡើងទៀតថា សមត្ថកិច្ចគ្រប់លំដាប់ថ្នាក់ កំពុងសហការគ្នាយ៉ាងសស្រាក់សស្រាំក្នុងការស្រាវជ្រាវរកមុខជនបង្ក និងកន្លែងស្នាក់នៅ ដើម្បីឈានដល់ការឃាត់ខ្លួន។

៤. ជាបញ្ហាសង្គមត្រូវតែដោះស្រាយ៖ មិនមែនទើបតែកើតឡើងលើបណ្ឌិត ស៊ុយ សារ៉េត ឡើយប៉ុន្តែកាត់ទោសជំនួសតុលាការ ដោយការប្រើអំពើហិង្សានេះមិនមែនជាលើកទីមួយឡើយ។ ដូច្នេះបញ្ហានេះត្រូវតែលុបបំបាត់ចោល តាមរយៈការចាប់ជនបង្កទាំងនោះ ដើម្បីទុកជាមេរៀនដល់ពលរដ្ឋផ្សេងទៀត។ លោកមេធាវី ឈី សម្បត្តិ ចាត់ទុកថា ការប្រើអំពើហិង្សាក្នុងការដោះស្រាយបញ្ហារបស់ប្រជាពលរដ្ឋ គឺជាអំពើដ៏អយុត្តិធម៌បំផុត ព្រោះកម្ពុជា ជាប្រទេសមានច្បាប់ ត្រូវយកច្បាប់មកដោះស្រាយ។

៥. សមត្ថកិច្ចបានអញ្ជើញសាក្សីជាច្រើនរូបនៅកន្លែងកើតហេតុ យកមកសួរនាំរួចរាល់អស់ហើយ និងមានលទ្ធភាពគ្រប់គ្រាន់ក្នុងការកំណត់អត្តសញ្ញាណជនបង្កទាំងនោះ ហើយកាន់តែងាយស្រួលក្នុងការឈានទៅដល់ ការឃាត់ខ្លួន។

ទិដ្ឋភាពនៅកន្លែងកើតហេតុ (រូបភាពពីហ្វេសប៊ុក)

គួររំលឹកថា លោកស៊ុយ សារ៉េត ដែលជាសាស្រ្ដាចារ្យនៅសាកលវិទ្យាល័យមួយ ត្រូវបានប្រជាពលរដ្ឋមួយក្រុម ចោមរោមវាយដំ រងរបួសជាទម្ងន់ កាលពីថ្ងៃទី១១ មីនា។ ការប្រើអំពើហិង្សានោះ កើតឡើងក្រោយពីមានប្រជាពលរដ្ឋមួយចំនួន អះអាងថាលោក ស៊ុយ សារ៉េត បង្កគ្រោះថ្នាក់ចរាចរណ៍ រួចបើករថយន្តរត់។ ក្រោយកើតហេតុ លោកត្រូវបានបញ្ជូនទៅសង្រ្គោះបន្ទាន់នៅប្រទេសវៀតណាម។ មកទល់ពេលនេះ លោកបានរួចផុតពីគ្រោះថ្នាក់ហើយ ប៉ុន្តែត្រូវសម្រាកព្យាបាលរបួសរយៈពេលយូរទៀត។ ចំណែកឯក្រុមគ្រួសាររបស់លោកស៊ុយ សារ៉េត បានប្ដឹងទាមទារសំណងចំនួន ១២០០លានរៀល ឬ ៣០ម៉ឺនដុល្លារអាមេរិក ពីសំណាក់អ្នកដែលប្រើអំពើហិង្សាទាំងនោះ៕

អត្ថបទ៖ ថោ ច័ន្ទឬទ្ធិ