តាក់ស៊ីអាកាស ដែលគ្មានមនុស្សបើក ត្រូវដាក់ឲ្យហោះហើរសាកល្បងនៅប្រទេសមួយ

2018-03-14 10:49:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

យន្តហោះតាក់ស៊ីគ្មានមនុស្សបើក កំពុងត្រូវបានសាកល្បង នៅប្រទេសនូវែលហ្សេឡង់ ដែលជាផ្នែកមួយនៃគម្រោងរបស់លោក Larry Page សហស្ថាបនិក Google ។

និយ័តកររបស់នូវែលសេឡង់ កាលពីថ្ងៃទី ១៣ មីនា បានសម្រេចអនុម័តគម្រោងសម្រាប់ក្រុមហ៊ុន Kitty Hawk របស់លោក Larry Page ដើម្បីផលិត និងសាកល្បងយន្តហោះតាក់ស៊ី នាពេលអនាគត។

យន្តហោះតាក់ស៊ីនេះ មានឈ្មោះថា Cora ដែលជាយន្តហោះប្រើប្រាស់នូវថាមពលអគ្គិសនី ដើម្បីដំណើរការ។ លក្ខណៈពិសេសរបស់វា គឺមានស្លាបចក្រតូចៗជាច្រើន ជាហេតុធ្វើឱ្យ យន្តហោះនេះមានសមត្ថភាពហោះឡើង និងចុះចត បានយ៉ាងងាយក្នុងទម្រង់បញ្ឈរ ដូចឧទ្ធម្ភាគចក្រដែរ។

យ៉ាងណាមិញ ក្រុមអ្នកអភិវឌ្ឍ បាននិយាយថា ដោយហេតុថា តាក់ស៊ីលើអាកាសនេះ មានសំឡេងស្ងាត់ល្អ។ ដូច្នេះហើយ គេអាចយកយន្តហោះនេះ ទៅដឹកអ្នកដំណើរក្នុងទីក្រុងបាន ដោយប្រើប្រាស់ដំបូលផ្ទះ និងចំណតឡាន ធ្វើជាកន្លែងចុះចតក៏បានដែរ។

នៅក្នុងការសាកល្បង ក្រុមហ៊ុន បានប្រើប្រាស់កុំព្យូទ័រចំនួន ៣ ដើម្បីធ្វើការកំណត់ផ្លូវហោះរហើររបស់តាក់ស៊ីនេះ។ ជាពិសេស វា អាចបើកឆ័ត្រយោងបាន ប្រសិនបើមានរឿងមិនប្រក្រតី កើតឡើងទៀតផង។

សូមជម្រាបថា តាក់ស៊ីលើអាកាសនេះ ត្រូវបានគេស្គាល់ពីមុនថា Zee Aero។ យន្តហោះនេះ អាចហោះបានចម្ងាយ ១០០ គីឡូម៉ែត្រ និងហោះដល់រយៈកម្ពស់ ៩០០ ម៉ែត្រ។ ជាពិសេសអាចហោះបានក្នុងល្បឿនដល់ទៅ ១៥០គីឡូម៉ែត្រក្នុង១ម៉ោង ដែលអាចផ្ទុកមនុស្សបាន ២ នាក់៕

សូមទស្សនាវិដេអូ៖

ប្រភព៖ Straits Times ប្រែសម្រួល៖ អឹុម ម៉េងស៊ាង