អតីតទីភ្នាក់ងារចារកម្មរុស្ស៊ីម្នាក់ថា រុស្ស៊ីចង់ធ្វើឃាតគាត់នៅនូវែលហ្សេឡង់

2018-03-15 03:07:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក Boris Karpichkov បានប្រាប់ទៅកាន់កម្មវិធីទូរទស្សន៍របស់ចក្រភពអង់គ្លេសមួយ ឈ្មោះ Good Morning Britain កាលពីពេលថ្មីៗនេះថា រុស្ស៊ីធ្លាប់បញ្ជូនភ្នាក់ងារសម្ងាត់របស់ខ្លួន មកសម្លាប់គាត់ដោយថ្នាំពុល ពេលគាត់កំពុងដើរនៅតាមផ្លូវ Queen Street នៅក្រុង Auckland ប្រទេសនូវែលហ្សេឡង់ កាលពីឆ្នាំ២០០៦។ ក៏ប៉ុន្តែ គម្រោងនេះ មិនទទួលបានជោគជ័យឡើយ។

លោក Boris Karpichkov

លោក Karpichkov ដែលចាកចេញពីតួនាទីភ្នាក់ងារចារកម្មរុស្ស៊ីកាលពីទសវត្សរ៍ឆ្នាំ១៩៩០ បាននិយាយថា គាត់ធ្លាប់កត់សម្គាល់ឃើញមនុស្សមួយចំនួន បានព្យាយាមដើរតាមគាត់ បន្ទាប់មកមានអ្នកសុំទានម្នាក់បានដើរមកជិត ហើយបានបាចរបស់ម្យ៉ាងដូចជាធូលីមកលើផ្ទៃមុខរបស់គាត់ រួចអ្នកសុំទាននោះក៏បានដើរចេញទៅបាត់។

លោក Karpichkov បន្តថា ភ្លាមៗនោះគាត់មានអារម្មណ៍ថា វិលមុខ ហើយក្រោយមកបានធ្លាក់ខ្លួនឈឺ ២ខែ ធ្វើឲ្យគាត់ស្រកទម្ងន់អស់ ៣០គីឡូក្រាម។ ជាមួយគ្នានេះដែរ លោកបានបង្ហើបប្រាប់កម្មវិធីដដែលថា មនុស្ស ៨នាក់ បានស្ថិតក្នុងបញ្ជីខ្មៅរបស់ភ្នាក់ងារសម្ងាត់រុស្ស៊ី។

ពាក់ព័ន្ធនឹងការអះអាងខាងលើ ប៉ូលិសនូវែលហ្សេឡង់ នៅថ្ងៃទី១៥ ខែមីនានេះ បានបញ្ជាក់ថា ពួកគេកំពុងស៊ើបអង្កេតលើករណីនេះ។

ក្រុង Auckland

គួរបញ្ជាក់ថា លោក Karpichkov បានគេចខ្លួនទៅរស់នៅចក្រភពអង់គ្លេស កាលពីទសវត្សរ៍ ១៩៩០ ហើយលោកបានទៅដល់នូវែលហ្សេឡង់ ចន្លោះពីខែមិថុនា ឆ្នាំ២០០៦ ដល់ ខែតុលា ឆ្នាំ២០០៧។

ដោយឡែកថ្មីៗនេះ រដ្ឋាភិបាលអង់គ្លេស ទើបតែធ្វើការបណ្ដេញមន្ត្រីទូតរុស្ស៊ីចំនួន ២៣រូបចេញពីអង់គ្លេស ក្រោយកើតមានករណីធ្វើឃាតដោយថ្នាំពុល ទៅលើអតីតទីភ្នាក់ងារចារកម្មអង់គ្លេស និងរុស្ស៊ី លោក Sergei Skripal និង កូនស្រីម្នាក់របស់គាត់៕

ប្រភព៖ Channelnewsasia ប្រែសម្រួល៖ លាភ.