ជំងឺមួយ កំពុងបំផ្លាញដំណាំដំឡូងមី ក្នុងខេត្ត៥ នៅកម្ពុជា

2018-03-19 09:15:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

មន្ត្រីជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ អំពាវនាវឲ្យប្រជាកសិករ ដាំដំឡូងមីនៅទូទាំងប្រទេសបង្កើនការប្រុងប្រយ័ត្នចំពោះការរាតត្បាតនៃជំងឺលើដំឡូងមី ដែលមានឈ្មោះថា ម៉ូស្សាអ៊ីក នៅខេត្តចំនួន ៥ នៅក្នុងប្រទេសកម្ពុជា គឺខេត្តរតនគិរី មណ្ឌលគិរី ក្រចេះ កំពង់ធំ និងខេត្តត្បូងឃ្មុំ។ នេះជាការចុះផ្សាយរបស់ទីភ្នាក់ងារសារព័ត៌មានកម្ពុជានៅថ្ងៃទី១៩មីនា។

លោក ហ៊ាន វណ្ណហន អគ្គនាយកនៃអគ្គនាយកដ្ឋានកសិកម្ម បានបញ្ជាក់ឲ្យដឹងនៅថ្ងៃទី១៩ ខែមីនា ឆ្នាំ២០១៨នេះថា ជំងឺ ម៉ូស្សាអ៊ីក ជាជំងឺដ៏កាចសាហាវ ដែលកើតនៅលើដំណាំដំឡូងមី និងមិនទាន់មានថ្នាំណាអាចទប់ស្កាត់បាននៅឡើយទេ ហើយជំងឺនេះ បានឆ្លងចូលប្រទេសកម្ពុជាកាលពីឆ្នាំ២០១៥កន្លងមក។

លោកបានបញ្ជាក់ថា ករណីនេះឆ្លងរាលដាលចូលមកកម្ពុជា តាមការនាំចូលពូជ ដំឡូងមីពីប្រទេសជិតខាង ដោយសារកង្វះប្រព័ន្ធត្រួតពិនិត្យភូតគាម អនាម័យនៅច្រកទ្វារព្រំដែន។ ប្រសិនបើជំងឺនេះ បន្តឆ្លងលើដំណាំដំឡូងមីនៅទូទាំងប្រទេស វាអាចនឹងធ្វើឲ្យប៉ះពាល់ដល់ផលិតកម្មដំឡូងមីកម្ពុជា ចាប់ពី ៤០ ទៅ ៦០ភាគរយ នៃផលិតកម្ម ដំឡូងមីសរុប។

បើតាមមន្រ្ដីជំនាញកសិកម្ម បានបង្ហាញថា ចំពោះរោគសញ្ញានៃដំណាំដំឡូងមីកើតជំងឺ ម៉ូស្សាអ៊ីក នេះ គឺស្លឹកដំឡូងមី មានពណ៌ ក្រឡេក្រឡា ហើយពេលឃើញដូចនេះ កសិករ គួរតែបំផ្លាញដំឡូងមីទាំងនេះចោល ដោយដុតកម្ទេចចោល ឬក៏កប់ចោលតែម្តង៕

អត្ថបទ៖ លាភ.