ទោះជាភ្លៀង ក៏ភ្ញៀវទេសចរ តស៊ូរង់ចាំមើលថ្ងៃរះចំកណ្ដាលកំពូលអង្គរវត្តដែរ
- 2018-03-21 03:23:36
- ចំនួនមតិ 0 | ចំនួនចែករំលែក 0
ទោះជាភ្លៀង ក៏ភ្ញៀវទេសចរ តស៊ូរង់ចាំមើលថ្ងៃរះចំកណ្ដាលកំពូលអង្គរវត្តដែរ
ចន្លោះមិនឃើញ
ប្រជាជនកម្ពុជាគួរតែមានមោទនភាពពេលឃើញរូបភ្ញៀវបរទេសគ្រប់ជាតិសាសន៍ទូលឆត្រ ពាក់អាវភ្លៀង ឈររង់ចាំមើលទិដ្ឋភាពអច្ឆរិយៈថ្ងៃរះចំពីលើកំពូលប្រាង្គប្រាសាទអង្គរវត្ត។
នៅថ្ងៃទី២ ត្រូវចំថ្ងៃទី២១ ខែមីនានេះភ្ញៀវទេសចរដែលភាគច្រើនជាភ្ញៀវអន្តរជាតិមកពីប្រទេសនានាជុំវិញពិភពលោក បានមកទស្សនាថ្ងៃរះពីលើកំពូលប្រាសាទអង្គរវត្ត។ ភ្ញៀវទេសចរដែលមកទស្សនាថ្ងៃរះថ្ងៃទី២នៃបាតុភូតដ៏អស្ចារ្យរយៈពេល៣ថ្ងៃនេះ បានងើបតាំងពីព្រលឹមម៉ោង៥ ដោយខ្លះដៃកាន់ឆត្រ ខ្លះពាក់អាវភ្លៀងដើរតម្រង់មកផ្លូវ និងស្រះទឹកខាងមុខប្រាសាទ។ បើទោះជាមានភ្លៀងធ្លាក់យ៉ាងណាក៏ដោយ ក៏ភ្ញៀវទេសចរទាំងនោះមិនរុញរាក្នុងការរង់ចាំទស្សនាទិដ្ឋភាពដ៏កម្រនិងពិសេសនេះដែរ។
បើតាមមន្ត្រីអភិរក្សប្រាសាទម្នាក់បានប្រាប់ឲ្យដឹងថា តាមការអង្កេតរាល់ឆ្នាំក្នុងរយៈពេល៣ថ្ងៃនៃបាតុភូតនេះ ថ្ងៃដែលព្រះអាទិត្យរះចំពីលើកំពូលប្រាសាទគឺ ថ្ងៃទី២ និងថ្ងៃទី៣ ចំណែកថ្ងៃទី១គឺព្រះអាទិត្យរះមិនចំកំពូលប្រាសាទនោះទេ។
សូមបញ្ជាក់ថាថ្ងៃទី២នៃបាតុភូតថ្ងៃរះចំពីលើកំពូលប្រាង្គប្រាសាទអង្គរវត្តនេះ អាកាសធាតុនៅក្នុងបរិវេណប្រាសាទអង្គរក៏ដូចជាខេត្តសៀមរាបទាំងមូលមានភ្លៀងធ្លាក់ដែលជាកត្តាធ្វើឲ្យភ្ញៀវទេសចរមិនអាចទស្សនាឃើញបាតុភូតព្រះអាទិត្យរះចំពីលើកំពូលប្រាសាទបានឡើយ។
យោងតាមការប្រកាសរបស់ក្រសួងទេសចរណ៍ បាតុភូតដ៏អស្ចារ្យនេះកើតមានឡើង២ដងក្នុងមួយឆ្នាំ ដោយលើកទី១ ក្នុង ខែមីនា ចន្លោះថ្ងៃទី២០ ដល់ថ្ងៃទី២២ខែមីនា ដូចច្នេះភ្ញៀវទេសចរទាំងអស់អាចទៅទស្សនានៅព្រឹកថ្ងៃស្អែកមួយថ្ងៃទៀត៕