ខេត្ត៤ ទទួលសិទ្ធិមួយដើម្បីបញ្ជាក់ប្រភពដើមទំនិញ សម្រាប់ការនាំចេញទៅថៃ

2018-03-21 06:24:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងពាណិជ្ជកម្ម បានធ្វើប្រតិភូកម្មនៃការចេញវិញ្ញាបនបត្របញ្ជាក់ប្រភពដើមទំនិញ (CO) ទម្រង់ (D) ដល់មន្ទីរពាណិជ្ជកម្មនៅក្នុងខេត្តចំនួន៤ ក្នុងពេលតែមួយគឺ ប៉ៃលិន បាត់ដំបង បន្ទាយមានជ័យ និងឧត្តរមានជ័យ ដើម្បីសម្រួលដល់ការនាំចេញកសិផលនៅតាមបណ្ដោយព្រំដែនកម្ពុជា-ថៃ។

ពិធីប្រកាសដាក់ឲ្យប្រើប្រាស់ជាផ្លូវការនូវការធ្វើប្រតិភូកម្មនៃការចេញវិញ្ញាបនបត្របញ្ជាក់ប្រភពដើមទំនិញ ទម្រង់ D សម្រាប់ខេត្តទាំង ៤នេះ ត្រូវបានរៀបចំឡើងនៅព្រឹកថ្ងៃទី២១ ខែមីនា ឆ្នាំ២០១៨ នៅសាលាខេត្តប៉ៃលិន ក្រោមអធិបតីភាពលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម។

លោក ប៉ាន សូរស័ក្តិ បានបញ្ជាក់ថា ការធ្វើប្រតិភូកម្មនេះមិនត្រឹមតែជាការផ្ទេរភាពជាម្ចាស់នៃមុខងារទេ ប៉ុន្តែថែមទាំងជាការទទួលខុសត្រូវក្នុងការគ្រប់គ្រង និងការអនុវត្តមុខងារឲ្យកាន់តែមានប្រសិទ្ធភាព និងតម្លាភាព ជៀសវាងនូវបាតុភាពអសកម្ម និងការកកស្ទះកសិផលជាយថាហេតុ។

ពិធីប្រកាសដាក់ឲ្យប្រើប្រាស់ជាផ្លូវការនូវការធ្វើប្រតិភូកម្មនៃការចេញវិញ្ញាបនបត្របញ្ជាក់ប្រភពដើមទំនិញ ទម្រង់ D (រូបភាព៖ ក្រសួងពាណិជ្ជកម្ម)

តាមទិន្នន័យរបស់នាយកដ្ឋាននាំចេញ-នាំចូលបានឲ្យដឹងថា ការនាំចេញនៅក្រោមប្រព័ន្ធអនុគ្រោះពាណិជ្ជកម្មទៅកាន់ទីផ្សារបរទេស បានកើនឡើងរហូតដល់ ជាង ១ម៉ឺនលានដុល្លារអាមេរិក (១១១៥៣ លានដុល្លារ) នៅក្នុងឆ្នាំ២០១៧ ពោលគឺស្មើនឹងជាង១៨% បើប្រៀបធៀបឆ្នាំ២០១៦ ដែលទឹកប្រាក់ត្រឹមតែ ជាង ៩ពាន់លានដុល្លារ (៩៤២១ លានដុល្លារ) ប៉ុណ្ណោះ។

ដោយឡែកការនាំចេញតាមវិញ្ញាបនបត្របញ្ជាក់ប្រភពដើមទំនិញ ទម្រង់ D ទៅកាន់ទីផ្សារតំបន់អាស៊ាន បានកើនឡើងប្រមាណជាង ៦៦% គឺពីទឹកបា្រក់ ជាង៧០០លានដុល្លារ (៧២៨ លានដុល្លារ) នៅក្នុងឆ្នាំ២០១៦ រហូតដល់ទឹកប្រាក់ជាង ១ពាន់លានដុល្លារ (១២១៤ លានដុល្លារ) នៅក្នុងឆ្នាំ២០១៧៕

អត្ថបទ៖ លាភ.