ស្ដេចគ្រឿងញៀនឡាវ រហស្សនាម "Mr. X" ត្រូវថៃចេញសាលដីកាកាត់ទោសហើយ!
- 2018-03-21 06:42:49
- ចំនួនមតិ 0 | ចំនួនចែករំលែក 0
ស្ដេចគ្រឿងញៀនឡាវ រហស្សនាម "Mr. X" ត្រូវថៃចេញសាលដីកាកាត់ទោសហើយ!
ចន្លោះមិនឃើញ
លោក Xaysana Keopimpha រហស្សនាម "Mr. X" ដែលជាស្ដេចគ្រឿងញៀន១រូបរបស់ឡាវ ត្រូវបានតុលាការប្រទេសថៃសម្រេចផ្ដន្ទាទោសឲ្យជាប់ពន្ធនាគារអស់១ជីវិត កាលពីថ្ងៃទី២០ ខែមីនា ឆ្នាំ២០១៨។
“Mr. X” ត្រូវបានប៉ូលិសឃាត់ខ្លួននៅឯព្រលានយន្តហោះបាងកក កាលពីខែមករា ឆ្នាំ២០១៧។ ការឃាត់ខ្លួននេះ ធ្វើឡើងខណៈស្ដេចគ្រឿងញៀនរូបនេះកំពុងដឹកជញ្ជូនថ្នាំញៀនរាប់សិបតោនពីឡាវចូលទៅកាន់ប្រទេសថៃ។ គ្រឿងញៀនដែលចាប់បាននោះមានប្រភេទមេតាហ្វេតាមីនគ្រីស្ដាល់ (ទឹកកក) និងប្រភេទយ៉ាបា (Yaba) ចំនួន ១,២លានគ្រាប់។
សូមបញ្ជាក់ថា ដំបូងឡើយតុលាការបាងកក សម្រេចកាត់ទោសប្រហារជីវិតលើលោក Xaysana តែក្រោយមកក៏ត្រូវបន្ថយមកត្រឹមទោសជាប់ឃុំឃាំង១ជីវិតវិញ ដោយសារលោកព្រមសារភាព និងសហការជាមួយសមត្ថកិច្ច។
ក្រៅពីស្ដេចគ្រឿងញៀន "Mr. X" ថៃក៏ចាប់បានជនជាតិថៃ៣នាក់ផងដែរ ដែលជាប់ពាក់ព័ន្ធនឹងករណីនេះ ហើយរឹបអូសទ្រព្យសម្បត្តិបានចំនួន ៣,២លានដុល្លារ៕