ក្រុមហ៊ុនធំៗលើពិភពលោក រួមគ្នាសាងសង់អគារខ្ពស់ជាងគេនៅកម្ពុជា

2018-03-21 09:33:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោកសាស្រ្តាចារ្យ ទួស សាភឿន ដែលបានចូលរួមបង្កើតគម្រោងប្លង់អគារមជ្ឈមណ្ឌលពាណិជ្ជកម្ម ថៃ ប៊ុនរ៉ុង បានអះអាងថា អគារកម្ពស់ ១៣៣ជាន់នេះ មានការចូលរួមគូសប្លង់ពីក្រុមហ៊ុនល្បីៗជាច្រើនលើពិភពលោក ដើម្បីយកពិសោធន៍រួមគ្នារបស់ពួកគេ មកដាក់បញ្ចូលក្នុងអគារនេះ ឲ្យកាន់តែមានភាពល្បីល្បាញ និងភាពទាក់ទាញ។

លោកសាស្រ្តាចារ្យ បានគូសបញ្ជាក់ថា ក្រុមហ៊ុនដែលបានចូលរួមគូសប្លង់អគារនេះ មានមកពីសហរដ្ឋអាមេរិក បារាំង និងចិន។ ក្នុងនោះ ក្រុមហ៊ុនមកពីអាមេរិក ដែលធ្លាប់បានគូសប្លង់អគារពាណិជ្ជកម្មពិភពលោក (World Trade Center) ទទួលការងារលើការបែងចែកមុខងារប្លង់ ហើយក្រុមហ៊ុនបារាំងដែលមានបទពិសោធន៍គូសគម្រោងប្លង់នៃអគារខ្ពស់ៗលើពិភពលោក ទទួលខុសត្រូវលើការសិក្សារចនាសម័ន្ធអគារ (Building Structure) ខណៈក្រុមហ៊ុនចិនទទួលខុសត្រូវលើការងាររចនាផ្នែកខាងក្នុង (Interior Design)។

យ៉ាងណាមិញ បើតាមលោកសាស្រ្តាចារ្យ ទួស សាភឿន គោលគំនិតប្លង់ (Concept plan) អគារមជ្ឈមណ្ឌលពាណិជ្ជកម្មលំដាប់ពិភពលោកមួយនេះ ត្រូវបានរក្សាអត្តសញ្ញាណដើម ដែលគូសដោយរូបលោកផ្ទាល់ ដោយមានការកែប្រែបន្តិចបន្តួចតែប៉ុណ្ណោះ។

ថ្មីៗកន្លងទៅនេះ អគារមជ្ឈមណ្ឌលពាណិជ្ជកម្ម ថៃ ប៊ុនរ៉ុង បានបើកការដ្ឋានដំបូង សម្រាប់ការដ្ឋានគម្រោងជញ្ជាំងបេតុងទប់ដី ដើម្បីធ្វើគ្រឹះបង្ការកុំឲ្យមានការបាក់ច្រាំងនៅពេលដែលចាប់ផ្តើមសាងសង់សំណង់អាគារភ្លោះទាំងមូល។ ការដ្ឋានសម្រាប់បេតុងទប់ដីនេះនឹងត្រូវចំណាយពេលប្រមាណជាងមួយឆ្នាំដើម្បីបញ្ចប់ការសាងសង់ ចំណែកកាលបរិច្ចេទបើកការដ្ឋានសាងសង់សំណង់អគារទាំងមូល គ្រោងនឹងចាប់ផ្តើមក្រោយការបញ្ចប់សាងសង់គ្រឹះរួចរាល់។ ចំពោះ ពេលវេលាបញ្ចប់ការសាងសង់អគារទាំងមូល លោកសាស្ត្រាចារ្យ ទួស សាភឿន នៅមិនទាន់អាចបញ្ជាក់បាននៅឡើយនោះទេ។

ពិធីបើកការដ្ឋានដំបូង នៃអគារមជ្ឈមណ្ឌលពាណិជ្ជកម្ម ថៃ ប៊ុនរ៉ុង

គម្រោង មជ្ឈមណ្ឌលពាណិជ្ជកម្ម ថៃប៊ុនរ៉ុង សាងសង់នៅលើផ្ទៃដីទំហំជិត ៥ម៉ឺនម៉ែត្រក្រឡា ដែលមានកម្ពស់ ៥៦១,៧ម៉ែត្រ (១៣៣ជាន់)។ បើគិតបញ្ចូលទាំងកម្ពស់អង់តែន ២៥ម៉ែត្រទៀត គឺមានកម្ពស់រហូតដល់ ៥៨៦,៧ម៉ែត្រ។ ការចំណាយនៃគម្រោងសំណង់ទាំងមូល មានចំនួនទឹកប្រាក់ជាង ៣ពាន់លានដុល្លា។

គូសបញ្ជាក់ផងដែរថា មជ្ឈមណ្ឌលពាណិជ្ជកម្មដ៏ខ្ពស់ស្គឹមស្កៃនេះ អាចចតឧទ្ធមាគចក្របានចំនួនពីរគ្រឿងនៅផ្នែកខាងលើនៃអគារ។ មិនតែប៉ុណ្ណោះ ចំណតក្រោមដីចំនួនពីរជាន់ មានសមត្ថភាពផ្ទុករថយន្ត ៣៨០០គ្រឿង និងម៉ូតូចំនួន ៣០០០គ្រឿង សម្រាប់អ្នកចូលមកប្រើប្រាស់អគារនេះ៕

អត្ថបទទាក់ទង៖

អត្ថបទ៖ សិរីឧត្តម