ក្រសួងឧស្សាហកម្ម ជំរុញឲ្យកម្ពុជាយកគំរូតាមសិង្ហបុរី ដោយបណ្ដុះគំនិត មិនចម្លងគេ
- 2018-03-22 03:18:19
- ចំនួនមតិ 0 | ចំនួនចែករំលែក 0
ក្រសួងឧស្សាហកម្ម ជំរុញឲ្យកម្ពុជាយកគំរូតាមសិង្ហបុរី ដោយបណ្ដុះគំនិត មិនចម្លងគេ
ចន្លោះមិនឃើញ
លោកទេសរដ្ឋមន្ត្រី ចម ប្រសិទ្ធ រដ្ឋមន្ត្រីក្រសួងឧស្សាហកម្ម និងសិប្បកម្ម បានជំរុញឲ្យកម្ពុជាយកគំរូតាមប្រទេសសិង្ហបុរី ដែលបានបណ្ដុះគំនិតប្រជាពលរដ្ឋខ្លួនតាំងពីក្មេងៗ ពេលពួកគេនៅសាលារៀន ឲ្យមានគំនិត មិនទទួលស្គាល់អ្នកលួចកម្មសិទ្ធិបញ្ញា និងមិនទិញរបស់ក្លែងក្លាយដែលលួចកម្មសិទ្ធិបញ្ញារបស់គេឡើយ។
ក្រសួងឧស្សាហកម្ម និងសិប្បកម្ម យល់ឃើញថា ប្រព័ន្ធនៃការចុះបញ្ជីការពារកម្មសិទ្ធិបញ្ញា ជាមូលដ្ឋានគ្រឹះមួយដ៏សំខាន់ និងផ្តល់ទំនុកចិត្ត សម្រាប់អ្នកវិនិយោគ ជាពិសេសសហគ្រិននៃសហគ្រាសធុនតូច និងមធ្យម អ្នកសិក្សាស្រាវជ្រាវ និងតក្កករ ដែលបានប្រើប្រាស់បញ្ញា និងទេពកោសល្យផ្ទាល់ខ្លួន ច្នៃប្រឌិតបង្កើតផលិតផលថ្មីៗ ក្នុងការប្រកួតប្រជែងផលិតផលលើទីផ្សារក្នុងប្រទេស តំបន់ និងអន្តរជាតិ។
លោកទេសរដ្ឋមន្ត្រី ចម ប្រសិទ្ធ បានបញ្ជាក់ថា ក្រសួងបានធ្វើកិច្ចសហប្រតិបត្តិការជាមួយអង្គភាពកម្មសិទ្ធិបញ្ញាអន្តរជាតិជាច្រើន រួមមាន ប្រទេសសឹង្ហបុរី ជប៉ុន និងសហគមន៍អឺរ៉ុប ព្រមទាំងកំពុងដំណើរការសហប្រតិបត្តិការជាមួយ ចិន និងកូរ៉េ ក្នុងគោលបំណង ជំរុញកិច្ចការពារកម្មសិទ្ធិបញ្ញានៅកម្ពុជាឲ្យដំណើរការទៅបានរលូន ខណៈដែលប្រទេសកម្ពុជាកំពុងមានការខ្វះខាតអ្នកជំនាញ ក្នុងការត្រួត ពិនិត្យនិងវាយតម្លៃការផ្តល់ប្រកាសនីយបត្រតក្កកម្ម។
ជាលទ្ធផល កិច្ចសហប្រតិបត្តិការនេះ បានផ្តល់លទ្ធភាពឲ្យយើងទទួលបាន ពាក្យស្នើសុំការពារប្រកាសនីយបត្រតក្កកម្មច្រើន បង្កើនប្រាក់ចំណូល និងអាចទទួលបានការ វិនិយោគបច្ចេកវិទ្យាថ្មីៗច្រើនទៀត៕