កសិករ បង្ខំចិត្តប្រមូលផលផ្លែស្វាយយកទៅលក់ក្នុងតម្លៃថោក ដោយសារបំណុល
- 2018-03-22 03:56:24
- ចំនួនមតិ 0 | ចំនួនចែករំលែក 0
កសិករ បង្ខំចិត្តប្រមូលផលផ្លែស្វាយយកទៅលក់ក្នុងតម្លៃថោក ដោយសារបំណុល
ចន្លោះមិនឃើញ
កសិករនៅខេត្តប៉ៃលិនបានអះអាងថា ប្រសិនបើមិនប្រញាប់បេះផ្លែស្វាយទៅលក់ឲ្យទាន់ពេលទេ គឺអាចនឹងគ្មានប្រាក់សងស្ថាប័នមីក្រូហិរញ្ញវត្ថុនោះទេ។ មូលហេតុដែលពួកគាត់បង្ខំចិត្តប្រមូលផលស្វាយ ព្រោះផ្លែស្វាយចាប់ផ្ដើមទុំនៅលើដើមបណ្ដើរៗ ហើយ គឺមិនអាចទុកបន្តទៅមុខទៀតបានឡើយ។
កសិកររូបនេះអះអាងទៀតថា លោកដាំស្វាយកែវរមៀតទាំងអស់ជិត១០ហិកតា ហើយទិន្នផលស្វាយឆ្នាំនេះ អាចបានប្រហែល ៦០តោន។ ដូច្នេះបើតម្លៃផ្លែស្វាយដូចបច្ចុប្បន្ន គឺលក់បានប្រាក់ចំនួន ៦ពាន់ដុល្លារអាមេរិកប៉ុណ្ណោះ។ លោកបន្ថែមទៀតថា ទិន្នផលដែលទទួលបាននេះ គឺគ្រួសារលោកច្បាស់ជាជំពាក់គេវ័ណ្ឌកហើយ ព្រោះលោកចំណាយអស់ដើមទុកក្នុងការថែទាំប្រមាណ ៨ពាន់ដុល្លារអាមេរិកក្នុងមួយឆ្នាំឯណោះ។
ចំណែកប្រធានមន្ទីរកសិកម្មរុក្ខាប្រមាញ់ និងនេសាទ ខេត្តប៉ៃលិន លោក សាយ សុផាត មានប្រសាសន៍ថា តម្លៃផ្លែស្វាយចុះថោកដោយសាររដូវនេះជារដូវដែលកសិករប្រមូលផលស្វាយច្រើនធ្វើឲ្យទិន្នផលស្វាយមានចំនួនច្រើនជាងតម្រូវការ។ លោកបន្ថែមទៀតថា កន្លងមកមន្ត្រីជំនាញពាក់ព័ន្ធនៅខេត្តប៉ៃលិនបានព្យាយាមទាក់ទងទៅខាងភាគីថៃ ដើម្បីឲ្យមកជួយទិញស្វាយពីកសិកររួចមកហើយដែរ ប៉ុន្តែដំណើរការនៅមិនទាន់បានប្រសើរទាំងស្រុងនៅឡើយ។
រីឯប្រធានសម្ព័ន្ធសហគមន៍កសិករកម្ពុជា លោក ថេង សាវឿន កត់សម្គាល់ថា នៅពេលដល់រដូវប្រមូលផលម្ដងៗ គឺដំណាំកសិផលរបស់ប្រជាកសិករគ្រប់ប្រភេទ តែងតែជួបបញ្ហារឿងតម្លៃចុះថោកជារៀងរាល់ឆ្នាំ។ លោកអះអាងទៀតថា មូលហេតុដែលតម្លៃកសិផលចុះថោកមិនឈប់ឈរនេះ គឺដោយសារប្រព័ន្ធរៀបចំដំណោះស្រាយនៅថ្នាក់ជាតិមិនទាន់បានដំណើរល្អប្រសើរ សម្រាប់ជួយដល់កសិករ។
សូមបញ្ជាក់ថា តម្លៃផ្លែស្វាយបានចុះថោកខ្លាំងចាប់ពីចុងខែកុម្ភៈមក។ កសិករបានអះអាងថាតម្លៃដែលពួកគាត់លក់ផ្លែស្វាយបានប្រាក់ចំណេញ គឺចាប់ពី ៨០០រៀលក្នុងមួយគីឡូក្រាមឡើងទៅ។ បើតាមការបញ្ជាក់ពីសមាគមស្វាយកំពង់ស្ពឺថា កម្ពុជាអាចផលិតផ្លែស្វាយបានរហូតដល់ជាង ១លានតោនក្នុង១ឆ្នាំ។ កន្លងមក កម្ពុជាបាននាំផ្លែស្វាយ ទៅកាន់ទីផ្សារប្រទេសមួយចំនួន ដូចជា ថៃ វៀតណាម ចិន និងកូរ៉េខាងត្បូង៕