ជម្លោះដីធ្លីរវាងពលរដ្ឋ និងក្រុមហ៊ុនផលិតស្ករសនៅកោះកុង ត្រូវបានបញ្ចប់ជាស្ថាពរហើយ
- 2018-03-22 06:32:50
- ចំនួនមតិ 0 | ចំនួនចែករំលែក 0
ជម្លោះដីធ្លីរវាងពលរដ្ឋ និងក្រុមហ៊ុនផលិតស្ករសនៅកោះកុង ត្រូវបានបញ្ចប់ជាស្ថាពរហើយ
ចន្លោះមិនឃើញ
ប្រជាពលរដ្ឋចំនួន ៣៧៥គ្រួសារ និងក្រុមហ៊ុន Koh Kong Plantation និងក្រុមហ៊ុន Koh Kong Sugar Industry ដែលទទួលបានសិទ្ធិសម្បទានសេដ្ឋកិច្ចវិនិយោគដំណាំអំពៅផលិតស្ករសនាំចេញ បានបញ្ចប់ករណីវិវាទដីធ្លីគ្នាជាស្ថាពរហើយ។ ការស្វែងរកដំណោះស្រាយនេះ ធ្វើឡើងក្នុងកិច្ចប្រជុំ១ នាព្រឹកថ្ងៃទី២២ ខែមីនា ឆ្នាំ២០១៨ នៅទីស្តីការក្រសួងរៀបចំដែនដី នគរូបនីយកម្ម និងសំណង់។
ក្រុមប្រជាពលរដ្ឋ ១៧៥គ្រួសារ បានយល់ព្រមទទួលយកដំណោះស្រាយជាទំហំដី ៣ហិចតា និងថវិកាចំនួន ២៥០០ដុល្លារក្នុង១គ្រួសារ ប៉ុន្តែមិនដោះស្រាយចំពោះប្រជាពលរដ្ឋដែលបានដោះស្រាយរួចហើយនោះទេ។ ចំណែកក្រុមប្រជាពលរដ្ឋ ២០០គ្រួសារផ្សេងទៀត យល់ព្រមទទួលយកដំណោះស្រាយជាដីទំហំ ១,៥ហិចតាក្នុង១គ្រួសារ។
ភាគីក្រុមហ៊ុន យល់ព្រមឲ្យរដ្ឋកាត់ដីទំហំ ៨២៥ហិចតា ស្ថិតក្នុងឃុំជីខលើ ស្រុកស្រែអំបិល ខេត្តកោះកុង ចេញពីដីសម្បទានសេដ្ឋកិច្ចដែលបានទទួលសិទ្ធិវិនិយោគពីរាជរដ្ឋាភិបាល ដើម្បីរដ្ឋធ្វើប្រទានកម្មជាកម្មសិទ្ធិជូនប្រជាពលរដ្ឋខាងលើ និងផ្តល់ថវិកាតាមចំនួនខាងលើ ជូនក្រុមប្រជាពលរដ្ឋក្នុងចំណោម ១៧៥គ្រួសារតាមសំណូមពរ។
សូមជម្រាបថា ជម្លោះដីធ្លីរវាងប្រជាពលរដ្ឋជាមួយក្រុមហ៊ុន Koh Kong Sugar របស់លោកឧកញ៉ា លី យ៉ុងផាត់ ក្នុងភូមិសាស្រ្តឃុំជីខលើ បានកើតឡើងតាំងពីឆ្នាំ២០០៦ រហូតមកដល់ពេលនេះ គឺប្រមាណជា១២ឆ្នាំហើយ មិនទាន់ដោះស្រាយចប់។ ប្រជាពលរដ្ឋបានតវ៉ាសុំអន្តរាគមន៍ពីប្រមុខដឹកនាំរាជរដ្ឋាភិបាល និងក្រសួងស្ថាប័នពាក់ព័ន្ធ ហើយកាលពីព្រឹកមិញនេះ ក្រសួងដែនដី បានបើកកិច្ចប្រជុំជាមួយភាគីពាក់ព័ន្ធដើម្បីដោះស្រាយ។
ភាគីដែលចូលរួមប្រជុំនេះដឹកនាំដោយលោក ជា សុផារ៉ា រដ្ឋមន្រ្តីក្រសួងដែនដី និងមានការចូលរួមពីលោក សាយ សំអាល់ រដ្ឋមន្រ្តីក្រសួងបរិស្ថាន លោក វេង សាខុន រដ្ឋមន្រ្តីក្រសួងកសិកម្ម លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម លោកស្រី មិថុនា ភូថង អភិបាលខេត្តកោះកុង លោក George Edgar ឯកអគ្គរដ្ឋទូតសហភាពអឺរ៉ុបប្រចាំនៅកម្ពុជា លោកឧកញ៉ា លី យ៉ុងផាត់ តំណាងក្រុមហ៊ុន តំណាងអង្គការសង្គមស៊ីវិល និងប្រជាពលរដ្ឋពាក់ព័ន្ធ៕