ប្រទេស៤ នឹងជួយជួសជុលប្រាសាទព្រះវិហារ និងកោះកេរ

2018-03-22 07:23:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រទេសចំនួន៤ នៃសមាជិកគណៈកម្មាធិការសម្របសម្រួលអន្ដរជាតិសម្រាប់អភិរក្ស និងលើកតម្លៃប្រាសាទព្រះវិហារ ហៅកាត់ អាយស៊ីស៊ីព្រះវិហារ រួមមានចិន ឥណ្ឌា រុស្ស៊ី និងថៃ គ្រោងជួសជុលរមណីយដ្ឋានប្រាសាទព្រះវិហារ និងប្រាសាទមួយចំនួនទៀត នៅក្នុងតំបន់រមណីយដ្ឋានកោះកេរ។

ប្រាសាទព្រះវិហារ

លោក គឹម សេតារា ប្រធានអាជ្ញាធរជាតិព្រះវិហារបានប្រាប់អ្នកសារព័ត៌មាន ក្រោយកិច្ចប្រជុំពេញអង្គលើកទី៤ នៃអាយស៊ីស៊ីព្រះវិហារ នៅមជ្ឈមណ្ឌលអាជ្ញាធរជាតិអប្សរា កាលពីព្រឹកថ្ងៃទី២១ ខែមីនា ឆ្នាំ២០១៨ថា តំបន់ប្រាសាទព្រះវិហារ មានតួប្រាសាទចំនួន៥កន្លែង ដែលមានភាពទ្រុឌទ្រោម ដោយតួប្រាសាទទី១ ទី២ និងទី៣ ប្រទេសចិន នឹងជួយធ្វើការជួសជុល និងអភិរក្ស។

លោកបន្តថា សម្រាប់តួប្រាសាទទី៤ និងទី៥ ព្រមទាំងជណ្ដើរខាងជើង គឺប្រទេសឥណ្ឌា ជាអ្នកជួយជួសជុល។ ជាមួយគ្នានេះ ប្រទេសរុស៊្សី នឹងជួយជួសជុលនៅគោបុរៈផ្សេងទៀត។ ចំណែកប្រទេសថៃ នឹងធ្វើការជួសជុលប្រាសាទមួយចំនួនទៀតក្នុងរមណីដ្ឋានប្រាសាទកោះកេរ។

ប្រាសាទកោះកេរ

លោកបានលើកឡើងថា រាជរដ្ឋាភិបាលបានខិតខំប្រឹងប្រែងស្វែងរកទាំងថវិកា និងអ្នកជំនាញ ដើម្បីឲ្យវប្បធម៌របស់កម្ពុជាកាន់តែមានភាពល្អប្រសើរឡើង១កម្រិតទៀត ខណៈដែលប្រាសាទទាំងនោះមានវ័យចំណាស់ និងមួយចំនួនមានការទ្រុឌទ្រោមខ្លំាង ដែលត្រូវការជួយសង្គ្រោះបន្ទាន់។

លោក គឹម សេតារា ក៏បានបង្ហាញក្តីបារម្ភអំពីប្រាសាទព្រះវិហារ ដែលកំពុងជួបកង្វះទឹកក្រោមដី ដែលធ្វើឲ្យប៉ះពាល់ដល់គ្រឹះប្រាសាទ និងមានផលប៉ះពាល់ពីភ្លើងឆេះព្រៃនៅរដូវប្រាំងផងដែរ៕

ប្រភព៖ AKP ប្រែសម្រួល៖ សំភី