អតីតប្រធានាធិបតីកូរ៉េ លី ម្យ៉ុងបាក់ ត្រូវបានចាប់ខ្លួនពីបទពុករលួយ
- 2018-03-23 01:48:39
- ចំនួនមតិ 0 | ចំនួនចែករំលែក 0
អតីតប្រធានាធិបតីកូរ៉េ លី ម្យ៉ុងបាក់ ត្រូវបានចាប់ខ្លួនពីបទពុករលួយ
ចន្លោះមិនឃើញ
លោកលី ម្យ៉ុងបាក់ (Lee Myung-bak) អតីតប្រធានាធិបតីកូរ៉េខាងត្បូង ត្រូវបានចាប់ខ្លួនហើយ បន្ទាប់ពីតុលាការក្រុងសេអ៊ូល ចេញដីកាចាប់ខ្លួនលោក កាលពីថ្ងៃព្រហស្បតិ៍ ទី២២ មីនាម្សិលមិញ ពីបទចោទប្រកាន់ជាច្រើន ដូចជាពុករលួយ ស៊ីសំណូក និងកេងបន្លំពន្ធជាដើម។
រដ្ឋអាជ្ញាកូរ៉េខាងត្បូង បានចោទប្រកាន់លោក លី ថាបានយកប្រាក់ប្រមាណជាជាង ១០,៣ពាន់លានដុល្លារ ពីស្ថាប័ន និងបុគ្គលមួយចំនួន អំឡុងពេលលោកនៅក្នុងតំណែង។ លោកក៏រងការចោទប្រកាន់ថាបានបង្កើតមូលនិធិសម្ងាត់នយោបាយដែលគិតជាប្រាក់ប្រមាណជាង ៣២លានដុល្លារផងដែរ។
កាលពីសប្ដាហ៍មុន អតីតប្រធានាធិបតី វ័យ ៧៦ឆ្នាំរូបនេះ ត្រូវបានសាកសួរដោយសមត្ថកិច្ចប្រហែលជាង ២១ម៉ោង។ នៅក្នុងការសាកសួរនោះ លោកបានទាត់ចោលស្ទើរតែគ្រប់ការចោទប្រកាន់ទាំងអស់ តែលោកព្រមទទួលស្គាល់ថា លោកពិតជាបានទទួលលុយចំនួន ១០ម៉ឺនដុល្លារពីភ្នាក់ងារចារកម្មជាតិមែន អំឡុងពេលកាន់តំណែង។ នេះបើតាមការបញ្ជាក់របស់រដ្ឋអាជ្ញា។
សូមបញ្ជាក់ថា លោក លី ធ្លាប់ជាប្រធានាធិបតីកូរ៉េខាងត្បូង ពីឆ្នាំ ២០០៨ ដល់ឆ្នាំ ២០១៣៕