រែកបន្លែលក់ជិត ២៧ឆ្នាំ គ្មានអ្វីសល់ ក្រៅពីរួចបាយ ៣ពេល

2018-03-23 03:28:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ពាក់អាវកញ្ចាស់រហែក ទឹកមុខស្ងួត ដំណើរដូចតាចាស់រេពេញផ្លូវ ដោយមានអម្រែកបន្លែទម្រន់ជិត៥០គីឡូក្រាមនៅលើស្មា ត្រាច់ចរពេញក្រុងភ្នំពេញ នេះជាសកម្មភាពរែកបន្លែលក់របស់អតីតទាហានវ័យ៥០ឆ្នាំប្លាយម្នាក់ មកពីខេត្តកណ្ដាល។

លោក អៀម ថៃ អាយុ៥៨ឆ្នាំ ជាអតីតទាហានចន្លោះឆ្នាំ១៩៨០-១៩៩០ នៅខេត្តកណ្ដាល។ រាល់ថ្ងៃ លោកដើររែកបន្លែលក់តាំងពីម៉ោង៥ព្រឹករហូតដល់ម៉ោង ៩យប់។ ក្នុងមួយថ្ងៃលោកយកបន្លែពីម៉ូយពី៤០ ទៅ ៥០គីឡូក្រាម តែភាគច្រើន លោកលក់បានតែពី២០ ទៅ២៥គីឡូក្រាមប៉ុណ្ណោះ។ បើថ្ងៃលក់ដាច់អស់ ផាត់បាយទឹកអស់សល់ពី២ទៅ៣ម៉ឺន តែបើលក់មិនដាច់វិញ ខាតចុងខាតដើមដឹងតែដាច់បាយហើយ។

លោកបន្តថា " របររែកបន្លែលក់ដើរពេញក្រុងនេះ ខ្ញុំមិនមែនទើបតែរកឥឡូវទេ ខ្ញុំរកតាំងពីឆ្នាំ១៩៩១មកម្ល៉េះ ខែបន្លែលក់បន្លែ ខែផ្លែឈើលក់ផ្លែឈើ លក់អត់ដាច់ អស់ដើម រត់ទៅធ្វើជាងសំណង់ និយាយទៅឆ្លាស់គ្នារហូត"។

ក្រៅពីរបររែកបន្លែនេះ លោក អៀម ថៃ ក៏ជាអ្នកលេងហ្គីតាក្នុងពិធីមង្គលការរបស់ក្រុមតន្ត្រីមួយក្រុមនៅជិតផ្ទះ ក្នុងមួយខែបាន២ ទៅ៣ រោង កម្រៃបានពីលេងភ្លេងនេះបាន៦ ទៅ ៨ម៉ឺនរៀលក្នុងមួយកម្មវិធី៕