ស្វាយជ្រុំ ជាតំបន់កំពុងមានសក្តានុពលខ្លាំងសម្រាប់ការវិនិយោគផ្នែកអចលនទ្រព្យ
- 2018-03-23 07:00:27
- ចំនួនមតិ 0 | ចំនួនចែករំលែក 0
ស្វាយជ្រុំ ជាតំបន់កំពុងមានសក្តានុពលខ្លាំងសម្រាប់ការវិនិយោគផ្នែកអចលនទ្រព្យ
ចន្លោះមិនឃើញ
លោក ស៊ី ប៊ុនថៃ នាយកគ្រប់គ្រងក្រុមហ៊ុនអភិវឌ្ឍន៍អចលនទ្រព្យ Babylon Investment Cambodia បានលើកឡើងថា ទីតាំងដីនៅតំបន់ស្វាយជ្រុំ ខេត្តកណ្តាល គឺកំពុងមានសក្តានុពលខ្លាំងសម្រាប់ការអភិវឌ្ឍគម្រោងខុនដូ ផ្ទះល្វែង និងបុរីជាដើម ព្រោះថាតំបន់នេះ គឺកៀកខ្លាំងទៅនឹងរាជធានីភ្នំពេញជាងទីតាំងផ្សេងៗ បើសិនជាគម្រោងសង់ស្ពានឆ្លងកាត់ទៅស្វាយជ្រុំត្រូវបានបញ្ចប់។
លោកបន្តថា បច្ចុប្បន្ននេះ តម្លៃដី និងអចលនទ្រព្យក្នុងទីតាំងនេះ កំពុងឡើងថ្លៃ តែនៅតែធូរថ្លៃនៅឡើយ បើធៀបនឹងតំបន់កៀកទីក្រុងផ្សេងទៀត។ នេះគឺជាកត្តាអំណោយផល និងឱកាសវិនិយោគច្រើន សម្រាប់អ្នករកស៊ីក្នុងវិស័យអចលនទ្រព្យ ព្រោះថា បើស្ពានសង់ចប់ តម្លៃដី អាចកើនឡើងទ្វេដង។
ថ្លែងក្នុងពិធីបើកគម្រោងអភិវឌ្ឍន៍លំនៅឋានផ្ទះតម្លៃទាប និងមធ្យម របស់ក្រុមហ៊ុនអភិវឌ្ឍន៍ អចលនទ្រព្យ Babylon Investment នៅលើទឹកដីស្វាយជ្រុំ ដែលត្រូវបានប្រកាសដាក់លក់ កាលពីថ្ងៃទី២១ ខែមីនា ឆ្នាំ២០១៨ លោក ចូ ណាតាន់ឃ្វិក អ្នកអភិវឌ្ឍគម្រោងអចលនទ្រព្យ Babylon ម៉ាឡេស៊ី បានបញ្ជាក់ឲ្យដឹងថា តំបន់ស្វាយជ្រុំ ពិតណាស់ គឺជាទីតាំងមួយដែលមានកត្តា អំណោយផលល្អច្រើន និងមានតម្លៃដីទាបនៅឡើយ បើប្រៀបធៀបនឹងទីតាំងផ្សេងទៀត ដែលស្ថិតនៅក្បែររាជធានីភ្នំពេញ។
លោកបានបន្ថែមថា ដោយមើលឃើញពីកត្តាអំណោយផលទាំងនេះ ទើបក្រុមហ៊ុនទាំង២ កម្ពុជា និងម៉ាឡេស៊ី សម្រេចបោះទុនវិនិយោគរួមគ្នាដើម្បីបង្កើតជាគម្រោងលំនៅឋានដែលមានតម្លៃសមរម្យ លើផ្ទៃដីប្រមាណ ១០ហិចតានៅតំបន់នេះ។
សូមរម្លឹកថា លោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានឲ្យដឹងកាលពីថ្ងៃទី២០ ខែមីនា ឆ្នាំ២០១៨ថា គម្រោងសង់ស្ពានឆ្លងកាត់ទន្លេ ភ្នំពេញ-អរិយក្សត្រ និងភ្នំពេញ-ក្តីតាកុយ ត្រូវបានក្រសួងបញ្ចប់ការសិក្សារួចរាល់ហើយ ដោយរង់ចាំតែថ្ងៃចាប់ផ្តើមសាងសង់ប៉ុណ្ណោះ ខណៈដែលដីនៅតំបន់នោះ កំពុងឡើងថ្លៃ៕
ចុចអាន៖ គម្រោងស្ពាន២កន្លែង ឆ្លងកាត់ទន្លេនៅភ្នំពេញ ត្រូវបានសិក្សារួចហើយ
---> Sabay ត្រូវការរើស Accounting Manager ។ បើមានចំណាប់អារម្មណ៍ដាក់ CV មក hr@sabay.com ឬចូលទៅកាន់ https://goo.gl/AsCd4N