ដឹងទីតាំងជាក់លាក់នៃការរៀបចំព្រះរាជពិធីច្រត់ព្រះនង្គ័លឆ្នាំ២០១៨នេះហើយ

2018-03-23 08:53:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ព្រះរាជពិធីច្រត់ព្រះនង្គ័ល និងតាំងពិព័រណ៍ផលិតផលកសិកម្ម សិប្បកម្មក្នុងស្រុក នឹងប្រព្រឹត្តទៅនាថ្ងៃទី០៣ ខែឧសភា ឆ្នាំ២០១៨ នៅបរិវេណវិទ្យាល័យស្វាយរៀង ភូមិស្រះវង់ សង្កាត់ស្វាយរៀង ក្រុងស្វាយរៀង ខេត្តស្វាយរៀង។ ព្រះរាជពិធីនេះ នឹងធ្វើឡើងក្រោមអធិបតីភាពដ៏ខ្ពង់ខ្ពស់របស់ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា។

ទាក់ទងនឹងការរៀបចំប្រារព្ធពិធីច្រត់ព្រះនង្គ័លនេះ សម្ដេច គង់ សំអុល ឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង និងជាប្រធានគណៈកម្មាធិការជាតិរៀបចំបុណ្យជាតិ-អន្តរជាតិ បានដឹកនាំកិច្ចប្រជុំនៅសាលប្រជុំសាលាខេត្តស្វាយរៀង កាលពីព្រឹកថ្ងៃទី២៣ ខែមីនា ឆ្នាំ២០១៨ ដោយមានការចូលរួមពីសំណាក់អាជ្ញាធរដែលពាក់ព័ន្ធ។

សូមរំលឹកថា ព្រះរាជពិធីច្រត់ព្រះនង្គ័លកាលពីឆ្នាំ២០១៧ គឺធ្វើឡើងនៅក្នុងបរិវេណសាកលវិទ្យាល័យ ជាស៊ីម កំចាយមារ ខេត្តព្រៃវែង។ ចំណែកកាលពីឆ្នាំ២០១៦ ព្រះរាជពិធីនេះ បានប្រារព្ធឡើង នៅទីលានជល់ដំរី ក្នុងបរិវេណអង្គរធំ នៅទីរួមខេត្តសៀមរាប។

ព្រះរាជពិធីច្រត់ព្រះនង្គ័ល ត្រូវបានប្រារព្ធឡើងជារៀងរាល់ឆ្នាំ នៅថ្ងៃ៤រោច ខែពិសាខ ដើម្បីប្រកាសប្រាប់ដល់ប្រជាកសិករថា រដូវធ្វើស្រែចម្ការ បានមកដល់ហើយ។ ក្នុងព្រះរាជពិធីច្រត់ព្រះនង្គ័ល ក្រៅពីស្តេចមាឃ និងព្រះមេហួរ រួមទាំងនង្គ័លអម២ទៀត បានភ្ជួររាស់សាបព្រួសជានិមិ្មត្តរូប ៣ ជុំហើយ ក៏មានពិធីផ្សងប្រផ្នូលតាមរយៈគោឧសភរាជ (គោបារបស់ព្រះមហាក្សត្រ) ឲ្យបរិភោគកសិផល ៦ មុខ រួមមាន៖ ពោត ល្ង សណ្តែក ស្រូវ ទឹក និងស្មៅ។ ក្នុងពិធីនេះ ក៏មានការបួងសួងសុំទឹកភ្លៀងផងដែរ៕