គយខ្មែរ និងវៀតណាម ឯកភាពលើ ៨ចំណុច ដើម្បីសម្រួលការធ្វើពាណិជ្ជកម្ម

2018-03-24 04:15:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

បន្ទាប់ពីប្រជុំស្វែងយល់ពីលំហូរទំនិញឆ្លងកាត់ប្រទេសកម្ពុជា-វៀតណាម រដ្ឋបាលគយកម្ពុជា និងវៀតណាម កាលពីពេលថ្មីៗនេះ បានធ្វើការពិភាក្សា និងផ្លាស់ប្ដូរព័ត៌មាន អំពីវឌ្ឍនភាពនៃការអនុវត្តកម្មវិធីកំណែទម្រង់ទំនើបកម្ម និងបានឯកភាពគ្នាលើចំណុចសំខាន់ៗដូចខាងក្រោម៖

១- ប្រគល់ភារកិច្ចជូននាយកដ្ឋានកិច្ចការអន្តរជាតិ ដើម្បីបញ្ចប់សេចក្ដីព្រាង អនុស្សរណៈយោគយល់គ្នា ស្តីពីកិច្ចសហប្រតិបត្តិការ និងការជួយគ្នាទៅវិញទៅមកក្នុងកិច្ចការគយ រវាងក្រសួងសេដ្ឋកិច្ច និងហិរញ្ញវត្ថុកម្ពុជា និងក្រសួងហិរញ្ញវត្ថុវៀតណាម ដើម្បីដាក់ជូនថ្នាក់ដឹកនាំពិនិត្យ និងសម្រេច

២- ជំរុញកិច្ចសម្រួលពាណិជ្ជកម្ម វិនិយោគ និងភ្ញៀវទេសចររវាងប្រទេសទាំងពីរ ជាពិសេសជំរុញការផ្សព្វផ្សាយជូនពាណិជ្ជករនៅពេលដែលមានបទប្បញ្ញត្តិគយថ្មីៗ

៣- បង្កើតចំណុចទំនាក់ទំនងសម្រាប់ផ្លាស់ប្ដូរស្ថិតិពាណិជ្ជកម្ម និងព័ត៌មានអំពីទំនិញឆ្លងកាត់ឲ្យបានជាប្រចាំ

៤- រៀបចំកិច្ចប្រជុំជាប្រចាំរវាងថ្នាក់អគ្គនាយកដ្ឋាន នាយកដ្ឋានគន្លឹះ និងថ្នាក់ខេត្ត

៥- បន្តពង្រឹងកិច្ចសហប្រតិបត្តិការលើការទប់ស្កាត់ បង្ក្រាប អំពើរត់គេចពន្ធ និងបទល្មើសគយ

៦- ជំរុញការរៀបចំអនុវត្តយន្តការត្រួតពិនិត្យតែមួយដង (Single Stop Inspection) នៅច្រកអន្តរជាតិបាវិត-ម៉ុកប៉ៃ

៧- ជួយសម្រួល និងពង្រឹងការគ្រប់គ្រងទំនិញឆ្លងកាត់ពីប្រទេសទី៣ មកកម្ពុជាដោយប្រើប្រាស់កំពង់ផែ Cat Lai ។ រដ្ឋបាលគយកម្ពុជាបានស្នើកុំឲ្យមានការកាត់សៀល និងរើទំនិញចេញពីកុងតេន័រនៅក្នុងទឹកដីវៀតណាម ដើម្បីរក្សាយថាប្រភេទ និងបរិមាណទំនិញ និងចំនួនកុងតេន័រ ដែលត្រូវប្រកាសដើម្បីបង់ពន្ធអាករនាំចូលឲ្យបានត្រឹមត្រូវ

៨- បន្តពង្រឹងកិច្ចសហការ និងការគាំទ្រគ្នាទៅវិញទៅមកលើឆាកអន្តរជាតិដូចជា ក្នុងអាស៊ាន អង្គការគយពិភពលោក អង្គការពាណិជ្ជកម្មពិភពលោក មហាអនុតំបន់មេគង្គ និងកិច្ចប្រជុំអាស៊ី-អឺរ៉ុប។

ក្នុងកិច្ចប្រជុំនោះដែរ រដ្ឋបាលគយទាំងពីរ ក៏បានវាយតម្លៃខ្ពស់ និងចាត់ទុកថា កិច្ចប្រជុំទ្វេភាគីនេះមានសារៈសំខាន់ ដែលបានរៀបចំឡើងដើម្បីឆ្លើយតបទៅនឹងតម្រូវការរបស់រដ្ឋបាលគយនៃប្រទេសទាំងពីរ ក្នុងការពង្រឹងកិច្ចសហប្រតិបត្តិការទាំងក្នុងកម្រិតទ្វេភាគី និងពហុភាគី និងឆ្លើយតបទៅនឹងកំណើនទីផ្សារ និងកិច្ចសម្របសម្រួលពាណិជ្ជកម្ម និងវិនិយោគរវាងប្រទេសទាំងពីរ៕

អត្ថបទ៖ លាភ.