គ្រឿងចក្រកម្ទេចមីនធុនធ្ងន់របស់ជប៉ុន បានទៅដល់ដៃស៊ីម៉ាក់ហើយ

2018-03-28 12:02:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គ្រឿងចក្រកម្ទេចមីនធុនធ្ងន់ ចំនួន ៥គ្រឿង និងគ្រឿងបន្លាស់មួយចំនួន ដែលជាអំណោយរបស់ប្រទេសជប៉ុន ត្រូវបានបញ្ជូនមកដល់កម្ពុជា កាលពីដើមខែមីនា។ ពេលនេះ គ្រឿងចក្រកម្ទេចមីនទាំងនោះ ត្រូវបានរក្សាទុកនៅទីបញ្ជាការភូមិភាគស៊ីម៉ាក់ ខេត្តបាត់ដំបង។

គ្រឿងចក្រកម្ទេចមីនធុនធ្ងន់នេះ មានទម្ងន់ពី ២៧ ទៅ ៣០តោន និងមានសមត្ថភាពវាយកម្ទេចគ្រាន់មីន នៅក្នុងចម្ការមីន ដោយមានប្រព័ន្ធការពារសុវត្ថិភាពខ្ពស់។

គ្រឿងចក្រកម្ទេចមីនធុនធ្ងន់ ចំនួន ៥គ្រឿង

លោក ហេង រតនា អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា ហៅកាត់ ស៊ីម៉ាក់ បានឲ្យដឹងថា គ្រឿងចក្រកម្ទេចមីនធុនធ្ងន់ទាំង ៥គ្រឿង និងគ្រឿងបន្លាស់ ដែលមានតម្លៃជិតសរុប ៤លានដុល្លារ ជាជំនួយឥតសំណងរបស់រដ្ឋាភិបាលជប៉ុន នឹងត្រូវប្រើប្រាស់ សម្រាប់សកម្មភាពបោសសម្អាតគ្រាប់មីនរហូតដល់ខែតុលា ឆ្នាំ២០១៩ នៅខេត្តបាត់ដំបង ក្នុងស្រុកចំនួន៤ គឺស្រុកសំឡូត ស្រុករតនៈមណ្ឌល ស្រុកបាណន់ និងស្រុកបរវេល។

លោក ហេង រតនា បញ្ជាក់ថា នៅក្រោយពិធីបុណ្យចូលឆ្នាំថ្មី ប្រពៃណីជាតិខ្មែរ ក្រុមបច្ចេកទេសជប៉ុន នឹងបង្រៀនកម្ពុជាពីការប្រើប្រាស់សម្ភារៈគ្រឿងចក្រធុនធ្ងន់នេះ ហើយនឹងធ្វើពិធីផ្ទេរ-ប្រគល់ ដើម្បីធ្វើសកម្មភាពបោសសម្អាតចម្ការមីនតែម្តង។

អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា បានលើកឡើងថា ចម្ការមីន នៅខេត្តបាត់ដំបង និងខេត្តបន្ទាយមានជ័យ ពិបាកស្មុគស្មាញ ហើយប្រឈមមុខនឹងអសុវតិ្ថភាពក្នុងប្រតិបតិ្តការបោសសម្អាតមីន ទើបអង្គភាពស៊ីម៉ាក់ សម្រេចពង្រាយគ្រឿងចក្រកម្ទេចមីនធុនធ្ងន់នេះ ដើម្បីកាត់បន្ថយការគំរាមកំហែង។

នៅឆ្នាំ២០១៨នេះ ស៊ីម៉ាក់ មានផែនការបោសសម្អាតផ្ទៃដីឲ្យបាន ១២០ គីឡូម៉ែត្រក្រឡា ដែលត្រូវការថវិកាជំនួយប្រមាណ ១៨លានដុល្លារ។ រហូតដល់មកពេលនេះ លោក ហេង រតនា លើកឡើងថា ស៊ីម៉ាក់ នៅខ្វះថវិកាប្រមាណពី ២ លាន ៥សែនដុល្លារ ទៅ ៣លានដុល្លារទៀត សម្រាប់ប្រតិបត្តិការបោសសម្អាតគ្រាប់មីន និងយុទ្ធភណ្ឌមិនទាន់ផ្ទុះ៕

អត្ថបទ៖ លីហៀង