OnePlus 6 ដែល​ជា​កំពូល​ស្មាតហ្វូន​ថ្មី​របស់ OnePlus នឹង​មាន​ដុំ​ឆក​១​នៅ​លើ​អេក្រង់​ចំ​ផ្នែក​កណ្ដាល​ខាង​លើ​បង្អស់ ដូច​ទៅ iPhone X របស់ Apple អ៊ីចឹង​ដែរ។ ដំណឹង​នេះ​ត្រូវ​បាន​ទម្លាយ​ឲ្យ​ដឹង​ពី​លោក Carl Pei សហ​ស្ថាបនិក OnePlus ក្នុង​កិច្ច​សម្ភាសន៍​ផ្ដាច់​មុខ​មួយ​ជាមួយ​នឹង​សារព័ត៌មាន The Verge កាល​ពី​ពេល​ថ្មីៗ​នេះ។

លោក Carl Pei បាន​ពន្យល់​ថា មូលហេតុ​ដែល OnePlus 6 មាន​ឆក​១​ដុំ​នេះ ក៏​ព្រោះ​តែ​ចង់​ឲ្យ​សមាមាត្រ​អេក្រង់​ធំ​ជាង​មុន ពោល​គឺ​អាច​លាត​អេក្រង់​បាន​ដល់​ទៅ ៩០% ឯណោះ។ បន្ថែម​ពី​នេះ លោក Carl Pei ក៏​បញ្ជាក់​ដែរ​ថា ដុំ​ឆក​១​នេះ​នឹង​មាន​រូបរាង​តូច​ជាង​ដុំ​ឆក​នៅ​លើ iPhone X។

បើ​តាម​​ពាក្យ​ចចាមអារ៉ាម​កន្លង​មក OnePlus 6 ទំនង​ជា​មាន​អេក្រង់​ទំហំ ៦,២៨​អ៊ីញ កម្រិត Full HD មាន Resolution 1080 x 2280p សមាមាត្រ 19:9 ហើយ​ប្រើ​អេក្រង់​ប្រភេទ Optic AMOLED។ កម្លាំង​ម៉ាស៊ីន​នឹង​ដំណើរការ​ដោយ​បន្ទះ​ឈីប​ខ្លាំង Snapdragon 845 រត់​ក្នុង​ល្បឿន 2.7GHz អម​ជាមួយ​ក្រាហ្វិច​កាត Adreno 630។ RAM របស់ OnePlus 6 មាន​២​ទំហំ​គឺ 6GB និង 8GB ឯ​អង្គ​ផ្ទុក​ទិន្នន័យ​វិញ​ក៏​ចែក​ជា​២​ដែរ​គឺ 128GB និង 256GB៕