ទំនាយ៧យ៉ាង អំពីហេតុភេទនៃទេវតាឆ្នាំថ្មី ព្រះនាមមហាទរាទេវី

2018-04-14 07:55:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

តាមរយៈសៀវភៅមហាសង្ក្រាន្ត ដែលរៀបរៀងដោយលោក អ៊ឹម បុរិន្ទ អគ្គលេខាធិការរង នៃគណៈកម្មការជាតិរៀបចំបុណ្យជាតិ និងអន្តរជាតិ គណៈកម្មការស្រាវជ្រាវវិជ្ជាហោរាសាស្ត្រ និងប្រពៃណីទំនៀមទម្លាប់ខ្មែរ បានបង្ហាញអំពីទំនាយនៃទេវតាឆ្នាំថ្មីដូចខាងក្រោម៖

១. ទំនាយទឹកភ្លៀង៖ ឆ្នាំនេះ ភពពុធជាអធិបតី ដឹកនាំផ្លូវទឹកទៅសុំទឹកភ្លៀងពីស្ដេចនាគ ហើយនាគបានបង្អុរទឹកភ្លៀង ៦០០មេ។ ដូច្នេះហើយនៅជម្ពូទ្វីបមនុស្សលោក នឹងបណ្ដាលឲ្យមានទឹកភ្លៀងនៅដើមឆ្នាំល្អ កណ្ដាលឆ្នាំល្អ និងចុងឆ្នាំភ្លៀងច្រើន។

២. ទំនាយអាកាសធាតុ៖ ទំនាយទាយថា អាកាសធាតុត្រជាក់ខ្លាំង។

៣. ទំនាយទឹកទន្លេ៖ ឆ្នាំនេះទំនាយទឹកទន្លេមានសំណល់៤ (បួន)។ ដូច្នេះទំនាយទាយថា ទន្លេ បឹងបួរ តូចណាស់តូចជាងឆ្នាំទាំងពួង។

៤. ទំនាយភោគផលរបស់កសិករ៖ ឆ្នាំនេះមានកេណ្ឌ (៦) ឈ្មោះថាលាភ ទំនាយថា ស្រូវសំណាប ស្រែចម្ការ បានផល ៩ភាគ ខូចខាតអស់តែ ១ភាគ ធុញ្ញាហារ មឹង្សាហារផល្លាហារ ភោជនាហារបានផលល្អ។ ប្រជានុរាស្ត្រមានសេចក្ដីសុខជាភិយ្យោភាព។

៥. ទំនាយការធ្វើស្រែ៖ ទំនាយទាយថា ស្រែទំនាប និងស្រែដីទួលគ្រប់ទីកន្លែង នឹងទទួលបានផលល្អ ដូចគ្នាទាំងពីរយ៉ាង។

៦. ទំនាយអំពីគ្រោះធម្មជាតិ៖ ឆ្នាំនេះត្រូវចំសេស៥ត្រូវត្រង់ ដើមអំពៅជាស្ដេច មានទំនាយថា មានភ្លៀងច្រើន ទឹកនឹងលិចស្រូវ។

៧. ទំនាយពីព្រះអាទិត្យ៖ ឆ្នាំនេះព្រះអាទិត្យគឺខ្យល់ទៅ ទំនាយថា បន្ទាប់ពីថ្ងៃមហាសង្ក្រាន្តទៅ៧ថ្ងៃ នឹងមានភ្លើងឆេះក្នុងស្រុក អ្នកតូចនឹងធ្វើទោសអ្នកធំ នាឆ្នាំនេះនឹងកើតឧត្បាតកក្រើកផ្ទៃក្រោមនាស្រុកនាមកណ្ដុរ នាមពពែ ស្រុកនាមកណ្ដុរនឹងកើតសិក រាស្ត្រនឹងធ្វើទោសមន្ត្រី សមណជីព្រាហ្មណ៍នឹងក្ដៅក្រហាយចិត្ត។

ទេវតាឆ្នាំថ្មីនេះ ព្រះនាម មហោទរាទេវី បុត្រីទី ៧ នៃកបិលមហាព្រហ្ម ទ្រង់អម្ពរពណ៌ខៀវ មានផ្កាត្រកៀត សៀតនៅព្រះកាណ៌ សោយ សាច់ទ្រាយ (ជាសត្វព្រៃពពួកឈ្លូស តែតូចជាងឈ្លូស) ជាភក្សាហារ ព្រះហស្តស្តាំកាន់កងចក្រ ព្រះហស្តឆ្វេងកាន់ត្រីសូល៍ គង់លើមយូរ៉ា ឬស្ដេចក្ងោក ជាពាហនៈ៕

អត្ថបទ៖ ថោ ច័ន្ទឬទ្ធិ