កោះ​តា​គៀវ​ ទី​តាំង​ធម្មជាតិ​ល្អ​បំផុត​សម្រាប់​ការ​សម្រាក​​កម្សាន្ត​

  • 2018-04-15 01:00:00
  • ចំនួនមតិ

ចន្លោះមិនឃើញ

កោះ​តា​គៀវ គឺជា​កោះ​ដ៏​តូច​មួយ​ដែល​មាន​ក្រឡា​ផ្ទៃ​ចំនួន ២៨គីឡូម៉ែត្រ​ការ៉េ និង​មាន​ចម្ងាយ​ប្រមាណ​ជា ១០គីឡូម៉ែត្រ​ពី​ក្រុងព្រះសីហនុ។

កោះ​​នេះ ជាទី​តាំង​ធម្មជាតិ​ល្អ​បំផុត​សម្រាប់​ការ​សម្រាក​កម្សាន្ត​ជាមួយ​មនុស្ស​ជាទី​ស្រឡាញ់ ក្រុម​គ្រួសារ និង​មិត្តភ័ក្ដិ។ ជាងនេះ​ទៅទៀត កោះ​តា​គៀវ​អំណោយផល​​សម្រាប់​ការ​ចុះ​មុជទឹក​ដើម្បី​មើល​ផ្កាថ្ម​ក្នុង​សមុទ្រ ដើរ​ក្នុង​ព្រៃ ហែល​ទឹក​កម្សាន្ត​លេង និង​សកម្មភាព​​ក្នុង​សមុទ្រ​ជាច្រើន​ផ្សេងទៀត។

នៅលើ​កោះ​តា​គៀវ ​មាន​កន្លែង​ស្នាក់នៅ​មួយ​ចំនួន​សម្រាប់​ប្រជាជន​ខ្មែរ និង​ភ្ញៀវ​បរទេស​ដែល​មាន​តម្លៃ​សមរម្យ។ ក្នុងនោះ ទេសចរ​ច្រើន​និយម​ស្នាក់នៅឆ្នេរ​ខ​ល​រ៉​ល (Coral Beach) និង​ខាក់​ទឹ​ស (KACTUS) ព្រោះ​​វា​មានការ​រចនា​ប្លែក បែប​ធម្មជាតិពិតៗ ដែល​ធ្វើ​ឲ្យ​អ្នកទស្សនា និង​អ្នក​ធ្វើដំណើរ​ចង់តែ​នឹង​ចំណាយ​ពេល​នៅ​ទីនោះ។

ដើម្បី​ទៅដល់​កោះ​តាគៀវ ជា​ទូទៅ គេ​ធ្វើ​ដំណើរ​​តាមរយៈ​ទូក​ម៉ាស៊ីន​ ដោយ​ចេញពី​ឆ្នេរ​អូ​ត្រេះ ​ដែល​មាន​តម្លៃ ១៣ ដុល្លារ សម្រាប់​ការ​ទៅ​និង​ត្រឡប់មកវិញ និង​ប្រើ​រយៈពេល​តិចជាង១ម៉ោង។ គេ​តែង​ចេញដំណើរ​ពី​ឆ្នេរ​អូ​ត្រេះ​នៅ​ម៉ោង១១ព្រឹក និង​ត្រឡប់​ពី​កោះ​មកវិញ​នៅ​ម៉ោង៩ព្រឹក​ជា​រៀងរាល់ថ្ងៃ៕


អត្ថបទ៖ កើត ចន្ទ្រា