ពលរដ្ឋខេត្តកោះកុង ចង់ឲ្យការទូទាត់ថ្លៃទឹក-ភ្លើងជាលុយរៀល

2018-04-11 02:54:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កាលពីពេលថ្មីៗនេះ ក្រុមប្រជាពលរដ្ឋរស់នៅក្រុងខេមរភូមិន្ទ ខេត្តកោះកុង បានស្នើឲ្យក្រុមហ៊ុន LYP Group របស់លោក លី យ៉ុងផាត់ ជួយដោះស្រាយបញ្ហាទូទាត់ការចំណាយថ្លៃទឹក និងអគ្គិសនីជាប្រាក់រៀលខ្មែរវិញ ខណៈពួកគាត់រងការខូចខាតច្រើនគួរសម។

លោក ទឹម សាមឿន និងអ្នកស្រី មិត្ត សុផល ដែលជាពលរដ្ឋនៅទីនោះ បានប្រាប់ថា ការទូទាត់ថ្លៃទឹក និងភ្លើងប្រើប្រាស់ប្រចាំថ្ងៃ គឺត្រូវគិតជាប្រាក់បាត (លុយថៃ) ដែលជាហេតុធ្វើឲ្យអ្នកដែលទៅបង់ថ្លៃជាលុយរៀលមានការខាតបង់។

ប្រជាពលរដ្ឋនៅកោះកុង ប្រាប់បន្តថា ការតម្រូវឲ្យបង់លុយបាតនេះ កើតឡើងជាច្រើនឆ្នាំមកហើយ តាំងពីក្រុមហ៊ុនផ្គត់ផ្គង់ទឹកស្អាត និងអគ្គិសនី LYP Group ចាប់ផ្ដើមវិនិយោគនៅទីនោះមកម៉្លេះ។

ចំណែកលោក ឈេង សុវណ្ណដា អភិបាលក្រុងខេមរភូមិន្ទ បានឲ្យដឹងថា លោកទើបតែឡើងកាន់តំណែង ដូច្នេះលោកពុំទាន់មានគម្រោងសុំសម្របសម្រួលជាមួយក្រុមហ៊ុននៅឡើយទេ។ ប៉ុន្តែនាពេលកន្លងទៅ ក្នុងអាណត្តិអភិបាលខេត្តចាស់ លោក ប៊ុន លីត ធ្លាប់ធ្វើលិខិតអន្តរាគមន៍ដោះស្រាយបញ្ហានេះម្ដងរួចមកហើយ។

ទាក់ទិននឹងការស្នើសុំនេះ ក្រុមហ៊ុន LYP Group មិនទាន់មានការបកស្រាយអ្វីនៅឡើយទេ។

សូមរំលឹកថា ការស្នើសុំឲ្យទូទាត់ជាលុយខ្មែររបស់ពលរដ្ឋខេត្តកោះកុង ធ្វើឡើងក្រោយពីសម្ដេចពិជ័យសេនា ទៀត បាញ់ ឧបនាយករដ្ឋមន្ត្រីក្រសួងការពារជាតិ បានបង្ហើបពីបំណងចង់ជួបលោក លី យ៉ុងផាត់ ដើម្បីសុំអន្តរាគមន៍បញ្ចុះតម្លៃទឹកស្អាត និងអគ្គិសនី កាលពីថ្ងៃទី៥ ខែមេសាកន្លងទៅ៕

ប្រភព៖ រស្មីកម្ពុជា ប្រែសម្រួល៖ ឈាង.