ចិន គ្រោងចំណាយ១០០លានដុល្លារ វិនិយោគវារីវប្បកម្មទឹកសាប និងទឹកប្រៃទំនើប នៅកម្ពុជា

2018-04-12 01:50:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមហ៊ុនចិន JinYuTang Aquaculture គ្រោងនឹងចំណាយ ១០០លានដុល្លារវិនិយោគវារីវប្បកម្មទឹកសាប និងទឹកប្រៃទំនើប នៅក្នុងប្រទេសកម្ពុជា។ តំណាងក្រុមហ៊ុន បានបង្ហាញពីគម្រោងនេះ ទៅកាន់លោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ក្នុងជំនួបពិភាក្សាគ្នា១ កាលពីថ្ងៃទី១១ ខែមេសា ឆ្នាំ២០១៨ នៅទីស្តីការក្រសួង។

តំណាងក្រុមហ៊ុន JinYuTang Aquaculture ក្នុងជំនួបពិភាក្សាជាមួយលោក វេង សាខុន នៅទីស្តីការក្រសួងកសិកម្ម កាលពីថ្ងៃទី១១ ខែមេសា ឆ្នាំ២០១៨។ រូបថត៖ ហ្វេសប៊ុកក្រសួងកសិកម្ម

ក្រុមហ៊ុននេះ មានបំណងវិនិយោគគម្រោងវារីវប្បកម្មលើផ្ទៃដី ២៤០ហិចតា ដែលមានទីតាំងស្ថិតនៅឃុំបឹងព្រាវ និងឃុំស្រែអំបិល ស្រុកស្រែអំបិល ខេត្តកោះកុង និងគម្រោងចិញ្ចឹមនិងភ្ញាស់នៅក្នុងសមុទ្រទឹកជ្រៅ ទំហំ២ពាន់ហិចតា ស្ថិតនៅតំបន់កោះរ៉ុងសន្លឹម ខេត្តព្រះសីហនុ។ ការវិនិយោគនេះ នឹងផ្តល់ឱកាសការងារបានចំនួន ៤៣០នាក់។

ក្រសួងកសិកម្មបានឲ្យដឹងថា ក្រុមហ៊ុននេះមានគោលដៅផ្គត់ផ្គង់ ចែកចាយ និងស្រាវជ្រាវផ្នែកវារីវប្បកម្មនៅកម្ពុជា តាមលក្ខណៈស្តង់ដារបរទេស។ បច្ចុប្បន្នក្រុមហ៊ុនកំពុងរៀបចំបញ្ចប់ការចុះបញ្ជីក្រុមហ៊ុននៅកម្ពុជា បន្ទាប់មកក្រុមហ៊ុននឹងរៀបចំផែនការមេ ហើយគ្រោងដាក់ស្នើជូនទៅក្រុមប្រឹក្សាអភិវឌ្ឍន៍កម្ពុជា៕

អត្ថបទ៖ សំភី