៨ ចំណុច ដែលអ្នកគួរធ្វើ មុនពេលបើកឡានផ្លូវឆ្ងាយ
- 2018-04-13 02:57:11
- ចំនួនមតិ 0 | ចំនួនចែករំលែក 0
៨ ចំណុច ដែលអ្នកគួរធ្វើ មុនពេលបើកឡានផ្លូវឆ្ងាយ
ចន្លោះមិនឃើញ
ប្រិយមិត្តភាគច្រើន ប្រហែលជាត្រូវបើករថយន្តទៅលេងស្រុកកំណើតតាមខេត្តនានា ដើម្បីចូលរួមអបអរពិធីបុណ្យចូលឆ្នាំខ្មែរ។ តើមុនបើកឡានផ្លូវឆ្ងាយ ប្រិយមិត្តគួរត្រួតពិនិត្យអ្វីខ្លះ?
១. ឆែកមើលកម្រិតទឹក និងប្រេងម៉ាស៊ីន
ឆែមើលកម្រិតប្រេងម៉ាស៊ីន ប្រេងហ្រ្វាំង ប្រេងចង្កូត ប្រេងប្រអប់លេខ សុទ្ធតែជាផ្នែកសំខាន់ ក៏ដូចជាធុងទឹក និងទឹកសម្រាប់លាងកញ្ចក់ជាដើម។
២. ឆែកមើលសម្ពាធខ្យល់ក្នុងកង់
មិនត្រឹមតែមើលកង់ទាំង ៤ ទេ សូម្បីតែកង់សាគួរក៏ត្រូវមើលដែរ ជៀសវាងនាំការលំបាកច្រើនដំណាក់កាល។ យល់ល្អ គួរបន្ធូរខ្យល់ចេញខ្លះឲ្យនៅក្រោមកម្រិតស្តង់ដារ ព្រោះពេលធ្វើរត់ឆ្ងាយទៅ កង់រថយន្តនឹងឡើងក្ដៅ ធ្វើឲ្យមាឌខ្យល់ក្នុងកង់រីក ដែលអាចបណ្ដាលឲ្យផ្ទុះបានបើសិនជាសប់តឹងពេក។
៣. ប្ដូរប្រេងម៉ាស៊ីនចោលតែម្ដង
ប្រសិនបើរថយន្តជិតដល់ពេលត្រូវប្ដូរប្រេងម៉ាស៊ីនហើយ (ឧទាហរណ៍ ថាសល់ ២០០គម ទៀត) អ្នកគួរតែប្ដូរចោលតែម្ដងទៅ ដោយហេតុថា ប្រេងម៉ាស៊ីនចាស់មានកំណច្រើនជាហេតុធ្វើឲ្យវាមិនអាចផ្ដល់ជាតិរំអិល ដល់ម៉ាស៊ីនដូចកាលទើបដូរថ្មីទេ។ ម៉្យាងទៀត ការប្ដូរប្រេងម៉ាស៊ីនថ្មី ក៏អាចជួយសន្សំសំចៃឥន្ធនៈ របស់អ្នកបានច្រើនដែរ។
៤. ឆែកមើលក្រឡាសំបកកង់រថយន្ត
អាចប្រើចុងឧបករណ៍វាស់សម្ពាធរថយន្ត ដើម្បីមើលកម្រាស់ក្រឡាកង់ថានៅសល់ជ្រៅកម្រិតណា។ បើគ្មានឧបករណ៍នោះទេ អាចប្រើកាក់ធម្មតាបាន។ កម្រាស់កង់ទាបបំផុតដែលអាចធ្វើដំណើរបានគឺ ១.៦ មម តែយល់ល្អបើកង់សល់ក្រឡាត្រឹម ២.៥ មម គួរតែប្ដូរកង់ចេញឲ្យហើយទៅ ព្រោះវាអាចផ្ទុះបែកពេលធ្វើដំណើរផ្លូវឆ្ងាយបង្កជាគ្រោះថ្នាក់ផ្សងៗ។
៥. មើលសំបុកខ្យល់ (អ៊ែរ) រថយន្ត
គួរធ្វើការលាងសម្អាត ឬប្ដូរសំបុកខ្យល់ថ្មី ដោយសារតែសំបុកខ្យល់ដែលថ្មី ឬលាងសម្អាតហើយ អាចត្រងខ្យល់ចូលក្នុងម៉ាស៊ីនបានស្អាតជាងមុនជាហេតុធ្វើឲ្យម៉ាស៊ីនស្ទុះ មិនសូវស៊ីសាំង។ មួយវិញទៀត បើសិនជាអ្នកចូលចិត្តប្រើម៉ាស៊ីនត្រជាក់ដោយបឺតខ្យល់ពីខាងក្រៅ ក៏គួរតែលាងសម្អាតតម្រងខ្យល់ម៉ាស៊ីនត្រជាក់នោះ ឬប្ដូរចោលដូចគ្នាដើម្បីឲ្យម៉ាស៊ីនត្រជាក់អ្នកដំណើរការស្រួលជាងមុន។
៦. លាងសម្អាតរថយន្ត
ការធ្វើបែបនេះអាចជួយសម្អាតដល់កញ្ចក់ អាចមើលផ្លូវបានច្បាស់ជាងមុន។ ម៉្យាងទៀត វាក៏អាចសម្អាតចង្កៀងរថយន្តឲ្យភ្លឺជាងមុនដែរ។
៧. ពិនិត្យមើលចង្កៀងមុខក្រោយ
ត្រូវឆែកមើលថា ចង្កៀងមុខ ហ្វាកូត ភ្លើងស៊ីញ៉ូ មុខ ក្រោយ និងស្តុបក្រោយរថយន្តនៅដំណើរការ។ បើសិនជាសង្ស័យថា អំពូលណាមួយមិនដំណើរការ គួរតែប្ដូរចោលម្ដងទៅ។
៨. យកឧបករណ៍ចាំបាច់ដាក់តាមឃ្លុបរថយន្ត
កង់សាគួរ ដែកដូយ ស្នប់ ទួរណឺវិស សោសម្រាប់មួលខ្ចៅ សុទ្ធតែជារបស់ចាំបាច់ សម្រាប់រថយន្តរបស់អ្នក។ ម៉្យាងទៀត ក៏អាចច្រកទឹកតាមឡានសម្រាប់បម្រុងក្នុងករណី ដែលធុងទឹកឡានមានការលេចធ្លាយ៕