Man City កាន់តែជិតលើកពាន ក្រោយឈ្នះ Spurs យប់មិញ
- 2018-04-14 23:44:29
- ចំនួនមតិ 0 | ចំនួនចែករំលែក 0
Man City កាន់តែជិតលើកពាន ក្រោយឈ្នះ Spurs យប់មិញ
ចន្លោះមិនឃើញ
ក្រុម Manchester City ត្រូវការឈ្នះតែ១ប្រកួតទៀតប៉ុណ្ណោះ នឹងអាចក្លាយជាម្ចាស់ជើងឯកលីគកំពូលអង់គ្លេស English Premier League ហើយ បន្ទាប់ពីបានយកឈ្នះក្រុម Tottenham Hotspur ៣-១ កាលពីយប់មិញនេះ (វីដេអូហាយឡាយ មាននៅផ្នែកខាងក្រោមនៃអត្ថបទ)។
កាន់តែពិសេសជាងនេះ គឺក្រុមលោក Pep Guardiola នឹងអាចឈ្នះជើងឯកដោយស្វ័យប្រវត្តិតែម្ដង ពោលគឺមិនចាំបាច់ឈ្នះ១ប្រកួតទៀតនោះទេ ក្នុងករណីក្រុមលេខ២ Manchester United ប្រកួតចាញ់ West Brom យប់នេះ ឬចាញ់ Bournemouth នាយប់ថ្ងៃពុធ។ បើសិនជា Man Utd អាចឈ្នះទាំង ២ប្រកួតនោះ Man City ក៏ទំនងជាមិនពិបាកនោះដែរ ដោយសារប្រកួតបន្ទាប់របស់ខ្លួន គឺប៉ះក្រុម Swansea ដែលកំពុងតែត្រដាបត្រដួស ក្បែរតំបន់បាតតារាង នាថ្ងៃទី២២ ខែមេសា។
ងាកមកនិយាយពីការប្រកួតយប់មិញវិញ។ Man City ដែលទើបធ្លាក់ចេញពី Champions League បានស្ដារមុខមាត់វិញក្នុងប្រកួតទល់នឹង Spurs ដោយចាប់ផ្ដើមសម្រុកតាំងពីដើមតង់ទី១។ ខ្សែប្រយុទ្ធវ័យក្មេង Gabriel Jesus បានស៊ុតបំបែកពងមាន់នៅនាទី ២២ មុនពេល Ilkay Gundogan បន្ថែមគ្រាប់ទី២ នៅ៣នាទីបន្ទាប់ ដោយការស៊ុតបាល់ពិន័យ ១១ម៉ែត្រ។ ឈានដល់ចុងតង់ទី១ នាទី ៤២ Christian Eriksen បានស៊ុតឲ្យ Spurs តាមពីក្រោយ ២-១។ ឈានចូលតង់ទី២ Spurs ហាក់លេងល្អជាងតង់ទី១ ដោយបានព្យាយាមដាក់សម្ពាធលើ Man City ម្ដងជា២ដង ប៉ុន្តែអ្វីៗ ត្រូវចប់ នៅពេល Raheem Sterling ស៊ុតគ្រាប់ទី៣ នៅនាទី ៧២។
បរាជ័យនេះ ធ្វើឲ្យ Tottenham នៅតែបន្តឈរលេខ៤ ដោយមាន ៦៧ពិន្ទុក្នុង ៣៣ប្រកួត ចាញ់ក្រុមលេខ ៣ Liverpool ចំនួន ៣ពិន្ទុ និងឈ្នះក្រុមលេខ Chelsea ចំនួន ៧ពិន្ទុ។ ចំណែក Man City មាន ៨៧ពិន្ទុ ដាច់ក្រុមលេខ២ Man Utd ចំនួន ១៦ពិន្ទុ៕
ទស្សនាវីដេអូខាងក្រោម៖
រូបភាព៖ Reuters